Topaz Premyer Liqasının son turunda “Rəvan”la bərabərə qalan (0:0) AZAL çalışmalarını davam etdirir. Futbolinfo.az xəbər verir ki, komanda gündə bir dəfə olmaqla Şüvəlanda növbəti – 16-cı turda öz meydanlarında qarşılaşacaqları “Xəzər Lənkəran”la görüşə hazırlaşır.
Komanda gündə 1 dəfə məşqlərə çıxır. “Təyyarəçilər” sabahdan etibarən matçın başlama saatında – 15:00-da çalışmalarını davam etdirəcək. Tərlan Əhmədovun yetirmələri bu görüşə itkilərlə hazırlaşır. Belə ki, “sarı-qırmızılılar”la görüşdə sıradan çıxan Aleksandr Quruli dünən müayinədən keçib. Gürcü futbolçunun arxa bud əzələsində dartılma və ön bud əzələsində sıxılma var. 30 yaşlı yarımmüdafiəçi 1 həftədən sonra məşqlərə başlaya biləcək. O, ən yaxşı halda 2-ci dövrənin son turunda meydana çıxa biləcək. “Rəvan”la matçda zədələnən digər futbolçu – Qvanzav Maqomedov isə sabahdan məşqlərə qoşulacaq.
Qeyd edək ki, komandanın heyətində daha öncə də Seymur Əsədov və Elmin Çobanov da zədəli idi. Adıçəkilən futbolçular uzun müddətdi ki, yaşıl meydanlardan kənardı.