Bu gün Azərbaycan futbol klublarının fanat qrupları metronun “Elmlər Akademiyası” stansiyasının qarşısına toplaşaraq Qarabağın azad olunmasında canlarından keçmiş, aprelin ilk günlərində böyük şücaət göstərərək erməni vandallarına qan udduran Azərbaycan ordusunun əsgərlərinə dəstək aksiyası keçirib. Futbolinfo.az xəbər verir ki, bu dəqiqələrdə də davam edən aksiya əsl birlik ab-havasında keçir.
Ölkənin bir çox fan-klublarının toplaşdığı məkanda əvvəlcə 1000-ə yaxın futbolsevər olsa da, sonradan onların sıraları xeyli genişləndi. Ətrafdakı insanların sevinc hissi ilə qarşıladığı bu izdihamın genişlənməsinin səbəbkarları ali təhsil ocaqlarının tələbləri olub. Hazırda aksiya iştirakçılarının sayı 4-5 minə çatıb.
Müxtəlif vətənpərvər şüarlar səsləndirən yürüş iştirakçılarına asayiş keşikçiləri nəzarət edir. Heç bir qarşıdurma, insident yaşanmır. Əksinə, polis əməkdaşlarının gözündən qürur hissi keçirdiklərini görmək çətin deyil.
Nümunəvi, əsl mehribançılıq şəraitində davam edən aksiyadan geniş reportajı futbolinfo.az axşam saatlarında təqdim edəcək.
