Avropa Liqasının birinci təsnifat mərhələsi çərçivəsində bu gün keçiriləcək Malta "Baltsan"ı ilə "Neftçi" arasındakı matç Azərbaycanda canlı yayımlanacaq. Futbolinfo.az xəbər verir ki, bu barədə paytaxt klubunun rəsmi saytı məlumat yayıb.
Həmin açıqlamanı təqdim edirik:
"Dəyərli azarkeşlər, Avropa Liqasının birinci təsnifat mərhələsinin püşkatma mərasimindən dərhal sonra "Baltsan” – "Neftçi” matçının Azərbaycanda canlı yayımlanması istiqamətində iki klub arasında danışıqlara başlanılmışdı. Dünənə qədər Malta tərəfi "Baltsan” – "Neftçi” matçının, ümumiyyətlə, televiziya vasitəsilə yayımlanmayacağını bildirilirdi. Dünən axşam saatlarında isə "Baltsan” klubu tərəfindən matçın yerli TVM-2 telekanalında yayımlanacağı bildirildi. Bundan dərhal sonra "Neftçi” adıçəkilən telekanalla danışıqlara başladı. Dünəndən davam edən danışıqlar bir neçə saat bundan əvvəl müsbət nəticələndi və "Neftçi” TVM-2 telekanalı ilə müqavilə imzalayaraq matçın Azərbaycanda yayımlanmasının maliyyə tərəflərini öz üzərinə götürdü. Eyni zamanda, CBC telekanalına qarşılaşmanın canlı yayımlanması üçün göstərdiyi peşəkar operativ texniki dəstəyə görə təşəkkürümüzü bildiririk.
Qeyd edək ki, "Baltsan” – "Neftçi” matçı Bakı vaxtı ilə saat 20:00-dan etibarən CBC İnternational telekanalı vasitəsilə canlı yayımlanacaq. İnternet vasitəsilə baxmaq istəyənlər aşağıdakı keçiddən matçı izləyə bilərlər: http://cbc.az/az/live"