Avropa Liqasının qrup mərhələsinin ikinci turunun oyunlarından sonra UEFA-nın reytinq siyahısı açıqlanıb. Futbolinfo.az xəbər verir ki, baş tutan 24 qarşılaşma cədvəldə müəyyən dəyişikliklərə səbəb olub.
Azərbaycan təmsilçiləri “Qəbələ” və “Qarabağ” uduzduğu üçün Azərbaycanın əmsalı dəyişməz qalıb. “Qəbələ”nin evdə Almaniyanın “Maynts” klubuna 2:3, “Qarabağ”ın səfərdə “Fiorentina”ya 1:5 hesabı ilə yenilməsindən sonra cari mövsüm toplanan xalımız 3,250-də qalıb.
Mövsümün qazancının 1,375-i “Qəbələ”nin hesabındadısa, “Qarabağ” 1,125 xal əldə edib. Artıq mübarizəni dayandıran “Neftçi” və “Kəpəz” hərəyə 0,375 xal qazanıb.
5 mövsümün nəticələrinə görə hesabını 16,750-di. Bu rəqəmin dəyişməməsi mövqeyimizin pisləşməsi ilə nəticələnib. Bunadək 0,200 xal qabaqladığımız Kipr ölkəmizi keçib. Artıq Azərbaycan siyahının 26-cısıdı. Mövsümə 24-cü yerdə başlayan ölkəmiz əvvəl İsrail, indi də Kipri önə buraxmaqla enişini davam etdirib.
Qeyd edək ki, qrup mərhələsində çıxış edən 80 klub 26 ölkəni təmsil edir. Siyahıya isə İspaniya başçılıq edir – 90,284.