Mini Futbol Liqasının (MFL) “B” Konferensiyası da 2-ci tura start verdi. Futbolinfo.az xəbər verir ki, baş tutan 5 qarşılaşmanın heç birində bərabərlik qeydə alınmayıb.
İlk turda “Futbolinfo”nu üstələyən “Feniks” bu dəfə “Bakaley” qarşısında “ağ bayraq” qaldırıb – 1:5. “Montin uşaqları” isə “8 MKR United”lə görüşdə minimal hesabla məğlub olublar – 2:3. “Hangover 96”-nın qapısından 3 cavabsız top keçirən “Tota” aktivinə növbəti 3 xalı yazdırmağı bacarıb.
İlk turda rəqib qapısını 10 dəfə silkələyən “Beerbaşa” bu dəfə də məhsuldar çıxışı ilə yadda qalıb. Tanınmış menecer Kamil Məmmədovun kapitanı olduğu kollektiv “İndigo”nu 7:2 hesabı ilə məyus edib. “Xəzər Bakı” isə “Gunners”i 5 dəfə meydanın mərkəzinə dəvət edib. “Dənizçilər”dən bu qollardan yalnız ikisinin əvəzini çıxmaq mümkün olub.
Maraqlıdı ki, qalib gələn 5 komandanın hamısı ilk turda da aktivini 3 xalla zənginləşdirmişdi. Başqa sözlə, “B” Konferensiyasında tədricən liderlər qrupu formalaşmaqdadı. Deməli, qarşıdakı turlarda “qan su yerinə axacaq”. Axı, liderlər əvvəl-axır baş-başa gələcəklər…