“Rəvan”ın baş məşqçisi Bəhmən Həsənovun futbolinfo.az saytına müsahibəsi:
– “Rəvan” qış fasiləsindən necə yararlandı?
– İlk günləri nəzərə almasaq, hər şey normal keçdi. Bizdən başqa, bir neçə komandanın da “Bayıl Arena”nın xidmətindən yararlanması yaxşı hazırlıq keçməyimizə çətinlik yaradırdı. Amma yanvarın 15-dən etibarən – “Səbail” təlim-məşq toplanışı üçün Türkiyəyə yollanandan sonra vəziyyət normallaşdı. Toplanışdan razı qalsam da, hələ ki, normal komanda yığa bilməmişik. İstədiyimiz gənc futbolçuları toplaya bilmədik. “Mil-Muğan”dan Ramazan Həsənovla anlaşmışdıq, amma komandası buraxmadı. Buna baxmayaraq, Yasin Həmid, Tagim Novruzov, Məhəmməd Alıyev, həmçinin bir neçə iranlını heyətə cəlb etmişik. Orta sahədə yaxşı futbolçularımız olsa da, cinahlarda bir az çətinliklərimiz var. Komandadan bir neçə oyunçu da ayrıldı ki, onların getməsini istəmirdim.
– Komandanın maliyyə vəziyyəti necədi?
– Maliyyə durumumuzda problem olmamalıdı. Maaşlar da ayın ilk 5 günündə veriləcək. Heyəti demək olar, bütünlüklə dəyişmişik. 15 yeni futbolçumuz var.
– Bəs köhnə oyunçuların məvacibi ödənilib?
– Xeyr, oktyabr, noyabr və dekabrın maaşları verilməyib.
– Dekabrda bizə müsahibənizdə demişdiniz ki, vəziyyət düzəlib, yaxın günlərdə komandanın heç kimə borcu qalmayacaq…
– Yaxın günlərdə bu məsələ həll olunmalı idi, amma həllini tapmayıb. Yeni yığılan komanda ayın 1-də maaşını alacaq.
– Bəs köhnə futbolçular nə vaxt alacaq?
– O da deyilənə görə ən qısa zamanda ödəniləcək. Bu sualı vitse-prezidentimiz İlqar Axundova versəniz, daha yaxşı olardı.
– “Rəvan” 2-ci dövrədə hansı yerə iddia edəcək?
– Bizimlə 1-ci yer arasında işıq ili qədər məsafə var. Düzdü, ilk 3 oyunumuz çətin rəqiblərə qarşı olsa da, ümumilikdə heç bir matçda yenilməməyə çalışacağıq. Ancaq inanıram ki, ilk oyunlardan sonra futbolçularımız bir-birinə uyğunlaşacaq. Heyətdə 1-2 gənc futbolçu olsa da, daha 7-8 cavan oyunçuya ehtiyacım var.
– “Rəvan”ın borclu olduğu legioner futbolçulara pulları ödənilibmi? Hansı ki, həmin oyunçulara görə son 2 mövsümdə xallarınız silinir…
– Düzdü, bu, mənim işim deyil, amma belə vəziyyət bizə təsir edir. Nə vaxt baxırsan “kümə”dəyik. Bu, futbolçuların motivasiyasına təsir edir. Düzdü, qələbədən-qələbəyə insan inkişaf edə bilmir, amma uğursuzluqdan dərs çıxarmaq olur. Qalibi mühakimə etmək olmaz, amma uğursuzluq insanı daha çox irəli aparır.
– Komandanın lisenziyalaşdırma şöbəsinə növbəti mövsüm Premyer Liqada iştirak üçün müraciət ünvanlayıbmı?
– Bizim 1-ci dəstənin tələblərinə uyğun komandamız var. Hər il biz müraciət edirik, yəqin ki, bu il də məktub ünvanlamışıq. İnfrastrukturmuz, müxtəlif yaş qrupları üzrə komandalarımız var.
ELMAR ABDULLA-ZADƏ