Futbol üzrə Azərbaycan milli komandasının baş məşqçisi Robert Prosineçki DÇ-2018-in seçmə mərhələsi çərçivəsində səfərdə Norveçə 0:2 hesablı məğlubiyyətdən sonra jurnalistlərin suallarını cavablandırıb.
Futbolinfo.az xəbər verir ki, xorvatiyalı mütəxəssis öncə bunları söyləyib:
– İlk növbədə, rəqibi qələbə münasibətilə təbrik edirəm. Təəssüf ki, komandam son oyunlardakı çıxışını göstərə bilmədi. Rəqibdə daha çox istək var idi, bizdən üstün idilər. Bu gün bizim günümüz deyildi. Bir neçə şansımız olsa da, yararlana bilmədik. Bu üzdən rəqib qələbəyə bizdən çox layiq idi. 3 gündən sonra bizi növbəti oyun gözləyir. San Marino ilə matça hazırlaşacağıq.
– Namiq Ələsgərovla Mahir Mədətovu start heyətə sürətli oyun istəyilə saldığınızı demişdiniz. Sürətli oyun istəyiniz niyə alınmadı, alındısa, razı qaldınızmı?
– Bəli, istədiyimi onlardan hardasa gördüm. Problem onda idi ki, çoxlu səhvlərə yol vermişik və asanlıqla toplar itirmişik. Qolları penaltidən və avtoqolla buraxdıq. Bugünkü məğlubiyyətin səbəbi çoxlu səhvlər idi. Belə səhvləri Norveç kimi komanda bağışlamır. Bizim də qol şanslarımız var idi. Amma istədiyimiz oyunu komandam sərgiləyə bilmədi.
– Penaltiyə səbəbkar olan və qırmızı vərəqə alan Bədavi Hüseynovun çıxışını necə dəyərləndirərdiniz: Zəif oyunu fiziki cəhətdən çatdırmaması ilə bağlı deyildi?
– Bu gün Bədavinin günü deyildi. Futbolda oyunun alınmadığı hallar olur. Amma məsələ təkcə onda deyil. Çoxlu top qəbulundan sonra hücuma keçərkən ötürmələrdə səhvlərə yol vermişik. Yüngül top itkilərindən rəqib istifadə edirdi. İlk yarı qolsuz bitsəydi, matç başqa cür alına bilərdi. Rəqib şanslarından yararlandı. 3 gündən sonra Bədavinin mövqeyində kimin oynayacağına məşqlərdən sonra qərar verəcəyəm.
– Sizə elə gəlmir ki, əksər futbolçular özlərini əsas heyət üzvləri saydıqları üçün istənilən oyunu sərgiləmirlər?
– Mən belə düşünmürəm. Bəlkə sizə elə gəlir? Rəqib bizdən üstün idi. Bunu qəbul etmək lazımdır. Norveç güclü komandadır. Bu rəqiblə asanlıqla oynaya bilmərik. Komandamda istək var idi. Lakin çoxlu səhvlər üzündən bunu 90 dəqiqə ərzində göstərə bilmədik.
– Kamran Ağayev son oyunlarda xeyli səhvə yol verir. Bəlkə növbəti oyunlarda Anar Nəzirova şans verəsiniz?
– Razıyam ki, Kamran Ağayev son 6 ayda klubsuz idi, təcrübəsi az idi. Çexiya çempionatında ötən tur meydana çıxdı. İkinci qolda onun səhvi yox idi. Çünki Rəşad Sadıqov avtoqol etdi. Növbəti oyunlarda kimin qapıda duracağı barədə suala hələlik cavab verə bilmərəm.