“Evdən hələ indi çıxıram. Hansısa fikir bildirmək üçün hələ tezdi”.
Futbolinfo.az xəbər verir ki, bu sözləri “Apasport”a saytına açıqlamasında “Keşlə”dən uzaqlaşdırılan Nizami Hacıyev deyib.
Azərbaycan Premyer Liqasının 13-cü turunda “Neftçi” ilə qarşılaşmadan sonra hüquq-mühafizə orqanları tərəfindən saxlanılan Hacıyev və komanda yoldaşı Mirhüseyn Seyidov dünən sərbəst buraxılıblar.
Məsələ ilə bağlı qısa fikir bildirən Hacıyev danışmaq istəmədiyini söyləyib: “Bilmirəm hansı oyunlar, kimin oyunları gedir. Bunu bilsəydim, nə dərdim olardı? Bu məsələlər barədə danışmaq üçün hələ tezdi”.
AFFA İntizam Komitəsi tərəfindən ömürlük futboldan uzaqlaşdırılan “Keşlə”nin sabiq kapitanı buna layiq olmadığını söyləyib: “Əsas harasa aparılmaq deyil, ömürlük futboldan getməkdi. Mən bunu haqq etmirdim”.