“Qəbələ”nin qışda heyətinə qatdığı Təmkin Xəlilzadə yeni komandasına uyğunlaşmaqdadı. “Zirə”də liderlərdən olan cinah oyunçusu əyalət klubunda start heyətinin daimi üzvü deyil. Bununla belə, o, futbolinfo.az saytına müsahibəsində komandanın vazkeçilməzlərindən olacağını vəd edib.
– Fasilədən necə yararlandınız?
– Normal hazırlıq keçdik. Fasilədən yararlanıb yoldaşlıq görüşləri də keçirdik. Komanda hazırdır. Özümüzü yaxşı hiss edirik və hər şey qaydasındadır.
– Sizi "Sumqayıt"la çətin matç gözləyir. Rəqibiniz son zamanların formada olan komandasıdır…
– Tam gücümüzlə hazırlaşmışıq. "Sumqayıt"ın gücünü bilirik. Amma meydana qələbə qazanmaq üçün çıxacağıq.
– Fasilədən öncə xal itirdiyiniz matçlar əhval-ruhiyyəyə təsir edib?
– Düzdür, əhval-ruhiyyəyə təsir etdi. İtirdiyimiz xallara görə kefimiz korlanmışdı. Amma artıq tam özümüzə gəlmişik və daha yaxşı çıxış etmək üçün çalışacağıq.
– Səncə, "Qəbələ"də meydana kifayət qədər çıxırsan?
– Başa düşmürəm ki, çox az meydana çıxmaq nə deməkdir?Mən 6 oyunun hamısında heyətdə olmuşam. 3 oyunda "11-lik"də, 3 oyuna isə sonradan daxil olmuşam. Bu, niyə meydana az çıxmaq kimi qəbul olunur ki?
– "Zirə"də daha çox oynadığın üçün belə düşünülür…
– Sadəcə, komandaya adaptasiya məsələsi var idi. Əsas heyətdə yerimi tutacağıma əminəm. Çünki öz potensialımı bilirəm. Ona görə də daha yaxşı olacaq. Zamana ehtiyac var.
– Sizi apreldə daha ciddi sınaq Azərbaycan kubokunda gözləyir. Məşqlərdə də çempionluq şanslarının az olduğunu düşünərək daha çox kubok matçlarına köklənmisinizmi?
– Bizim üçün belə düşüncə yoxdur. Hər iki turnirdə yaxşı oynamaq və qalib olmaq üçün mübarizəni davam etdirəcəyik.
– Milli komandanın Belarus və Makedoniyaya qarşı oyunlarını izlədinmi?
– Əlbəttə, izlədim və düşünürəm ki, hər şey yaxşı olacaq. Milli komanda oyundan oyuna daha güclü olacaq. Fikrim belədir.
– Millinin son yoldaşlıq görüşləri üçün heyətə dəvət alacağını gözləyirdin, yoxsa əvvəlcədən düşünürdün ki, Qurban Qurbanov digər futbolçuları sınayacaq?
– Təbii ki, dəvət gözləyirdim. Niyə də gözləməyim? Mən milli komandanın üzvüyəm.
FƏRİD