Almaniyanın “Ayntraxt” klubu Portuqaliyanın “Benfika” klubundan icarə götürdüyü Luka Yoviçin transfer hüquqlarını satın alıb.
Futbolinfo.az xəbər verir ki, bu barədə Frankfurt təmsilçisinin rəsmi saytı məlumat yayıb.
Yoviç 2017-ci ilin yayında iki illik icarəyə götürülmüşdü. Lakin o, Almaniyada uğurlu çıxışı ilə Avropanın aparıcı klublarının diqqət mərkəzinə düşdüyü üçün, “Ayntraxt” serbiyalı futbolçunu birdəfəlik transfer etməyə qərar verib.
“Benfika”ya 7 milyon avro təzminat ödəyən Bundesliqa təmsilçisi, Yoviçlə 2023-cü ilədək müqavilə imzalayıb.
Yoviç bu mövsüm Bundesliqada 27 matçda 17 qola imza atıb, 6 məhsuldar ötürmə müəllifi olub. O, Avropa Liqasında 11 oyuna 8 qol, 1 məhsuldar ötürmə ilə yadda qalıb.
Serbiya yığmasının da şərəfini qoruyan gənc futbolçu ilə İspaniyanın “Real”, “Barselona”, İtaliyanın “İnter” və “Yuventus”, Almaniyanın “Bavariya” klublarının maraqlandığına dair iddialar səslənməkdədi.