“Sumqayıt”ın yeni transferi Höccət Haqverdi üçün debüt yaxşı alınmadı. Komandası səfərdə “Keşlə” üzərində vacib qələbə qazansa da, mərkəz müdafiəçisinin zədələnib əvəzlənməsi kefini pozdu. Lakin meydanda olduğu 59 dəqiqə onda futbolumuz haqda müəyyən təəssüratlar yaranmasına kifayət edib.
Son günlər bir neçə dəfə Premyer Liqamız haqda fikirlərini bölüşən müdafiəçi futbolinfo.az saytına müsahibəsində də oxşar fikirlər söylədi.
– Azərbaycanda ilk oyununa çıxdın. Çempionatı necə dəyərləndirirsən?
– Azərbaycana, “Sumqayıt”a gəldiyim üçün çox xoşbəxtəm. Sadəcə, özüm 100 faiz formada deyiləm. Məşqlərdə əlimdən gələni edirəm ki, tam formama qayıdım.
– “Keşlə” üzərində qələbə qazandınız…
– Bizim üçün olduqca vacib qələbə idi. Çünki bura gəlməmişdən öncə də komandanın oyunlarını izləyirdim və bilirdim ki, 2-ci dövrəni qələbəsiz başa vurmuşduq. Lazımlı qalibiyyət idi. Əsas rəqiblərimizdən birindən xal almaq yaxşı oldu.
– Azərbaycan Premyer Liqası səni qane etdimi?
– Açığı, Azərbaycan çempionatı haqqında bura gəlməmişdən öncə məlumatım yox idi. “Sumqayıt”dan təklif aldıqdan sonra araşdırdım. Kənardan Azərbaycan çempionatı zəif görünsə də, əslində elə deyil. Bura gəldikdən sonra gördüm ki, klubların şəraiti yaxşıdır, futbolçuların səviyyəsi yüksəkdir. Bütün fikirlərim dəyişdi. Hazırda bura gəldiyim üçün sevinirəm. Belə davam eləsə, Azərbaycan çempionatı daha yaxşı yerlərə gələcək.
– “Sumqayıt”ın gücü hansı yerlər üçün mübarizə aparmağa imkan verir?
– Bir həftədir ki, burdayam. Yaxşı baş məşqçimiz və komandamız var. Qarşıdakı turlarda daha yaxşı olacaq. Komandadakı ab-havanı görəndə bilirsən ki, yuxarı yerlər üçün mübarizə aparmaq olar.
– Azərbaycanda səni nə təəccübləndirdi?
– Məni Azərbaycanda ən çox keyfiyyət təəccübləndirdi. İnfrakstruktur və oynanılan futbolun keyfiyyəti çox sevindiricidi.
– Amma ilk oyunda zədələndin.
– Düzdür, matçı başa vurmadım. Zədələndim və meydandan çıxdım. Amma indi yaxşıyam və komandanın məşqlərinə qoşulmuşam.
– Hansı klubumuzu fərqləndirə bilərsən?
– “Sumqayıt”dan təklif alanda komandanın birinci və ikinci dövrədəki oyunlarını izlədim. Fərqləndiyə biləcəyim iki komanda var – “Qarabağ” və “Neftçi” keyfiyyətli futbolçulardan təşkil olunub. Onların səviyyəsi bəllidir.
AĞA