Futbol üzrə Azərbaycan milli komandasının baş məşqçisi Canni De Byazi Türkiyə yığmasına qarşı keçiriləcək yoldaşlıq oyunundan öncə fikirlərini bölüşüb.
Futbolinfo.az xəbər verir ki, italiyalı mütəxəssis bu gün qardaş ölkədə baş tutan mətbuat konfransında bunları söyləyib:
“Əvvəlcə bu iki qardaş ölkənin oyunu üçün burada olduğum üçün sevinirəm. Türkiyə uğurlu çıxış edərək, Avropa çempionatının final mərhələsinə vəsiqə qazandı. Türkiyə millisini təbrik etmək istəyirəm. Olduqca önəmli uğur əldə etdilər və önəmli yarışda mübarizə aparacaqlar. Uğurlar arzulayıram. Qazanacaqları uğur bizi də qürurlandıracaq. Güclü komanda ilə qarşılşacağıq. Rəqibə çətinlik yaşatmaq üçün əlimizdən gələni edəcəyik. Bu amil qarşı tərəfin də xeyrinə olacaq”.
Azərbaycan millisindəki 10 aylıq işini dəyərləndirən 65 yaşlı baş məşqçi pandemiya ilə bağlı bəzi çətinliklərinin olduğunu vurğulayıb: “Əsas olan beynəlxalq arenada təcrübə qazanmaqdır. Düşünürəm ki, komandamız həm böyüyür, həm də inkişaf edir. Gələcəkdə hər şey daha yaxşı olacaq”.
De Byazi Türkiyə və İtaliya yığmaları arasında AÇ-2020-nin açılış matçına da toxunub: “Açılış oyunu olduğundan, hər iki komandaya çətin olacaq. İtaliya yığmasının yaxşı komanda olduğunu düşünürəm. Eyni zamanda son duruma baxdıqda, Türkiyə millisinin çox yaxşı legionerləri var. Olduqca keyfiyyətli komandadır. Yaxşı oyun olacağını düşünürəm. İtaliya millisi Roberto Mançinin gəlişindən sonra Şenol Günəş kimi gənclərə daha çox şans verir. Fikrimcə, maraqlı oyun olacaq. Günəş ilə futbol mövzusunda istənilən söhbətə hazıram. Təcrübəli mütəxəssisdir, əlində yaxşı oyunçuları var. Bu futbolçularla lazımi analizləri edib”.
Təcrübəli mütəxəssis qarşıdakı 3 yoldaşlıq oyunu ilə bağlı hədəflərini açıqlayıb: “Hər matçda əlimizdən gələnin ən yaxşısını edəcəyik. Bizim üçün önəmli qarşılaşmalardır. Hər bir futbolçunun hazırkı durumunu görməliyik. Onları seçmə mərhələ oyunlarına hazırlamaq lazımdır”.
Qeyd edək ki, mayın 27-də Alanyadakı Oba stadionunda keçiriləcək Türkiyə – Azərbaycan oyununa Bakı vaxtı ilə saat 21:00-da start veriləcək.