İyunun 12-də tarixdə ilk dəfə Azərbaycanda futbol üzrə Avropa çempionatının final mərhələsinin ilk oyunu keçirilib. Futbolinfo.az xəbər verir ki, Azərbaycan Respublikasının Prezidenti İlham Əliyev və birinci xanım Mehriban Əliyeva A qrupunun Bakı Olimpiya Stadionunda keçirilən Uels-İsveçrə matçına baxıblar.
Avropa çempionatının oyunlarının Bakıda keçirilməsi Azərbaycan idmanının beynəlxalq səviyyədə qazandığı növbəti uğurun bariz nümunəsidir. Ölkəmiz indiyədək idmanın müxtəlif növlərinə aid mötəbər beynəlxalq yarışlara yüksək səviyyədə ev sahibliyi edib. Bu gün ən nüfuzlu idman qurumlarının böyük beynəlxalq yarışlara ev sahibliyi hüququnu tərəddüd etmədən Azərbaycana verməsi də təsadüfi deyil.
Uels – İsveçrə matçı gərgin mübarizə şəraitində keçib. Matçın ilk hissəsi qolsuz başa çatıb. İsveçrə millisinin hücumçusu Bril Embolo matçın 49-cu dəqiqəsində hesabı açıb. Bundan sonra hücumlarının sayını artıran Uels komandası 74-cü dəqiqədə Kiffer Murun qolu ilə hesabı bərabərləşdirib. Matçın 85-ci dəqiqəsində İsveçrə yığmasının hücumçusu Mario Qavranoviçin Uels millisinin qapısına vurduğu qol isə videonəzarət sistemində baxıldıqdan sonra qeydə alınmayıb. Oyun 1:1 hesablı heç-heçə ilə başa çatıb.
Qeyd edək ki, Avropa çempionatının 60 illik yubileyi münasibətilə AÇ-2020-nin oyunları müxtəlif ölkələrdə təşkil olunub. Bakı Olimpiya Stadionu A qrupu çərçivəsində iyunun 16-da Türkiyə – Uels və iyunun 20-də isə Türkiyə – İsveçrə oyunlarına da ev sahibliyi edəcək. İyulun 3-də isə Bakıda 1/4 final mərhələsinin bir qarşılaşması olacaq.
