Turda cəmi 2 komanda qalib gəldi və onlar hazırda turnir cədvəlinin zirvəsindədilər. Ən yaxşı futbolu sərgiləyən bu kollektivlər göstərdikləri oyuna layiq mövqedə qərar tutublar.
Samir Abasovun dediklərini artıq kimsə ciddiyə almır. Hər situasiyada sudan səbəblər gətirən “Neftçi”nin baş məşqçisi bir az da öz səhvlərindən, heyətin komplektləşməsində etdiyi yanlışların indi bumeranq kimi özünə qayıtmasından danışsa, pis olmaz. Dünənki “Sumqayıt”ı məğlub edə bilməməyin heç bir bəraəti yoxdu.
Heyət sıxıntısı baxımından “kimyaçılar” bu gün ən pis vəziyyətdə olan komandadı. Və Samir bəy Sezar Meza Kollinin, Xorxe Korreanınyoxluğunu itki saymaqla yalnız rəhbərliyin gözünə kül üfürə bilər. Bu oyunçular meydanda olanda komandaya hansı xeyri veriblər ki, yoxluqları da itki olsun? Və ya heyət üzü görməyən Roman Bask nə əcəb indi yada düşüb? Onların hamısının layiqli əvəzedicisi var, o “Sumqayıt”dı ki, istənilən oyunçunun yoxluğu komandaya təsir edir. Və Abasovun yetirmələri bir neçə vacib oyunçusu olmayan bu komandanın qapısına yol tapa bilmədi.
Əslində, “Sumqayıt”ın qol epizodu daha çox oldu. Ayxan Abbasov müdafiəni əla təşkil edib, oyunu əks-hücumlar üzərində qurdu və istədiyinə nail oldu. Qonaqlar rəqibə ciddi qol şansı vermədi, xüsusilə ikinci hissədə daha üstün təsir bağışladı. İlk dəfə sistem dəyişikliyi edib dördlü müdafiə ilə oynayan bakılılar isə ön xəttdəki üstünlükdən yararlanmağı bacarmadı. Nəticədə komandanın Premyer Liqanın 13-cü turunu 4-cü pillədə qapayacağı aydın oldu.
Həftənin bağlanış matçı daha maraqlı keçdi. “Zirə” uduzmasaydı, ikinci pillədə qalacaqdı, “Qəbələ” isə yalnız qələbə sayəsində “Qarabağ”a qonşu olacaqdı. Bölgə təmsilçisi rəqibinin 4 oyunluq məğlubiyyətsizlik seriyasını qırmağı bacardı. Düzdü, “qartallar” bütün turlarda qol vurmaq ənənəsinə sadiq qaldı, lakin bu, yalnız kiçik təsəllidi.
Hər şey “Zirə” üçün çox pis başladı. Nemanya Andelkoviçin zədə alıb əvəzlənməsindən 2 dəqiqə keçmiş Ürfan Abbasovun ötürməsindən sonra gözlənilməz trayektoriya cızan top tora daxil oldu. Az sonra Rövlan Muradov cərimə zərbəsini ustalıqla yerinə yetirdi. Bəlkə “Qəbələ” özü də belə startı gözləmirdi. “Zirə” fasilə ərəfəsində Davit Volkovun sayəsində hesab arasında fərqi azaldıb ümildlənsə də, sonradan bu qolun matçda sonuncu olduğu aydınlaşacaqdı.
Andelkoviçin zədələnməsi, Cəlal Hüseynovun meydana daxil olması ilə limitə üzündən oynamaq şansı qazanan digər gənc Rüstəm Nuruyevin məcburən əvəzlənməsi “Zirə”ni çətinə saldı. Baş məşqçi Rəşad Sadıqov hər nə qədər Rüstəmin növbəti sarı vərəqəni alacağından ehtiyatlandığını desə də, əslində, o, daha təcrübəli futbolçu sayəsində orta sahəni qaydasına salmağı düşünürdü. Maraqlıdı ki, ikinci qol məhz oyuna yeni daxil olan İlkin Muradovun kobudluğundan sonra təyin olunan cərimə zərbəsindən vuruldu.
“Qəbələ”nin qələbəsi təsadüfi deyildi. Elmar Baxşıyevin ən yaxşı şəkildə idarə etdiyi komanda ilk dəqiqələrdən rəqibi üstələməyi bacardı, sürətli oyunla üstünlük qazandı. “Zirə” heyətdəki itkiləri rotasiya sayəsində yoluna qoyanacan iş işdən keçmişdi. İstənilən halda, liderlərə yaraşan baxımlı oyun izlədik və nəticə ədalətli oldu. Meydan sahiblərinin fasilədən sonra daha yaxşı təsir bağışlaması isə ağıllı müdafiə olunan “Qəbələ”ni təslim etməyə kifayət etmədi.
Ötən mövsümü “Zirə”nin əlindən alan Elçin Məsiyevin bu matça təyinatı sanki qəsəbə təmsilçisində psixoloji gərginliyə səbəb olmuşdu. Cari çempionatda ilk dəfə “qartallar”ın oyununda görünən FIFA referisi oyunun nəticəsinə ciddi təsir etməyə imkan tapmadı, bu baxımdan “Qəbələ”nin yaxşı oyunu ona kömək etdi. Lakin eynigüclü rəqiblərin görüşündə hakimin azca simpatiyası qüvvələr nisbətinin dəyişməsinə kifayət edir.
Məsiyev eyni epizodlarda ikili standartlara söykənən qərarlar verməklə bu matça təsadüfən göndərilmədiyini göstərirdi. “Qəbələ” 87-ci dəqiqədə deyil, daha öncədən azlıqda qalmalıydı. Belə ki, Omar Hani ikinci sarı vərəqəni daha öncədən haqq etmişdi. Qırmızı vərəqə alan iordaniyalının meydanı tam tərk etməmiş oyunun bərpası hakimin səhvi idi, lakin daha böyük qüsuru o, matça cəmi 2 dəqiqə əlavə edəndə göstərdi – bu, niyyətin göstəricisi idi, istəyinə çatmışdı.
“Qəbələ”nin qələbəsi layiqli idi, lakin “Zirə”nin oyunçularının özündən çıxmasında, istədikləri futbolu sərgiləyə bilməməsində rəqibin taktiki gedişləri, intizamlı oyunu ilə yanaşı Məsiyev amilinin qıcıq mənbəyi olması da rol oynadı. Və Elçin Rəşad Sadıqova sarı vərəqə verməklə ona AFFA-nın xəbərdalığını çatdırdı – bu, hələ başlanğıcdı. “Zirə”nin baş məşqçisi özünün belə gözdən salınmasına imkan verməməlidi: çıxış yolunu mütəxəssis özü düşünsün. Belə etirazlar hər matçda olur, lakin hər dəfə yalnız Məsiyev Sadıqovun qarşısında vərəqə çıxarırsa…
İkinci dövrənin son turu ərəfəsində liderlər qrupunda maraqlı vəziyyət yaranıb. “Qəbələ” ilk üçlükdə yerini təmin edib və evdə “Neftçi”dən bir az da uzaqlaşmağa çalışacaq. Qələbə komandanı ikinci pillədə daha rahat möhkəmlədə bilər, çünki əsas izləyici olan “Zirə”ni də “Qarabağ”la matç gözləyir.
CAVAD