“Qarabağ” qarşısıalınmaz olub. Ağdamlılar bu mövsüm ölkəmiqyaslı yarışlarda rəqib tanımır və dünən 13-cü oyunda 13-cü qələbəsini qazandı.
Misli Premyer Liqasının 3-cü turundan təxirə salınmış matçdakı rəqibin – “Turan Tovuz”un zatən çempionu büdrədəcəyi gözlənilmirdi. Məhdud heyəti olan qərblilər, yalnız mümkün qədər müqavimət göstərə və kiçik hesabla məğlub ola bilərdi. Zədəlilərin bolluğu, bir neçə əsas oyunçunun yoxluğu bir yana, “Qarabağ” Ayxan Abbasovun yetirmələrinin müdafiə olunma qabiliyyətini nəzərə alaraq əsas heyəti meydana buraxmışdı.
Bəlkə də tovuzlular bir hissə dözəcəkdi, lakin Vüsal Məsimov rəqibin təzyiqinə davam gətirməyib qapıları səhv salandan sonra mənzərə aydınlaşdı. Bütün oyunu hücumda keçirən, pressinqlə meydan sahiblərinə mərkəz xəttinə çatmağa imkan verməyən “Qarabağ” hələ fasiləyəcən işi bitirdi – 2:0.
İkinci hissədə də ağdamlılar daha çox hücumda oldu. Amma həm “Turan Tovuz” yaxşı müdafiə olundu, həm də qonaqlar növbəti turda çıxacaqları “Sabah”la zirvə matçını yada salıb güclərinə qənaət etdilər. Daha az riskli oynayan, zədədən qaçmağa çalışan “Qarabağ” futbolçuları beləcə növbəti qələbəsini qazanıb ən yaxın izləyicisi ilə xal fərqini beşə çatdırdı.
İndi maraqlı mənzərə yaranıb. Belə ki, “Qarabağ” 39 xalı 40 qol vuraraq əldə edib. Komandanın məhsuldar oynaması bir yana, ağdamlılar +32 top fərqinə malikdir ki, rəqiblərinin hətta vurduğu qol bu qədər deyil, ən yaxındakı “Sabah” 30 dəfə fərqlənib (+20).
Ardıcıl 2 oyunda uduzan “Turan Tovuz”un xal durumu o qədər də pis deyil. Debütant 13 tura 15 xal toplayıb və özü ilə bərabər imkana malik klublardan, hətta daha yaxşı vəziyyətdə olan “Səbail”dən öndədi. Lakin gərgin qrafik komandanın daha yaxşı duruma gəlməsinə mane ola bilər. Növbəti turda Gəncədə baş tutacaq Qərb derbisi yalnız sıradan çempionat matçı olmayacaq. “Kəpəz” də son məğlubiyyətini “Qarabağ”dan alıb, amma tovuzlulardan daha çox istirahət ediblər, üstəlik, evdə oynayacaqlar.
Nəticənin necə olacağını proqnozlaşdırmaq çətindi, amma Gəncədə Tovuzdakı qədər azarkeşin stadiona gəlməyəcəyi dəqiqdi. Dünən 5800 nəfərqlə mövsümün rekordunu yeniləyən tovuzlular qonşu şəhərdə daha az azarkeş qarşısında oynayacaq. Gəncə stadionuna maksimum 3000 azarkeşin buraxılmasına icazə var.
CAVAD
