“Yaxşı oyun keçirdik, təəssüf ki, uduzduq. Amma hər kəs öz stadionunda “Qarabağ”a qarşı oynamağın nə qədər çətin olduğunu bilir” – bunu futbolinfo.az-a açıqlamasında “Qəbələ”nin müdafiəçisi Ruan Renato deyib.
O, Misli Premyer Liqasının 17-ci turunda “Qarabağ”a 0:1 hesablı məğlubiyyətdən və kubokda bu rəqiblə keçirəcəkləri cavab görüşündən söz açıb: “Komandamız çempionat matçında rəqibə yaxşı müqavimət göstərdi. Qarşıda həlledici oyun var. Gözəl oyun olacağına inanıram və hazır olmalıyıq. Bilirik ki, səhv edə bilmərik. Qəbələdə çıxış etməyimiz, azarkeşlərimizlə bir yerdə oynamaq bizə kömək edəcək. Evdə oynamaq həmişə çox yaxşıdır. Mən komandamızın potensialına həqiqətən inanıram və əminəm ki, yarımfinala vəsiqə qazanmaq imkanımız var”.
Təcrübəli futbolçu kubokun önəmindən danışıb: “Azərbaycan Kuboku bizim üçün çox önəmlidir. Çünki o, həm də komandanı avrokuboklara daşıyacaq. Ona görə də biz bu yarışı çox yüksək dəyərləndiririk. Növbəti oyun mövsümün ən vacib oyunudur. Hər şeyimizi verməliyik ki, qələbəni azarkeşlərimizlə birlikdə qeyd edə bilək, məğlubiyyətə yas tutmayaq”.