“Səbail” yenə son pillədən qurtuldu. Şahin Diniyevin baş məşqçi postuna gəlişindən sonra ardıcıl iki qələbə qazanan Bayıl təmsilçisi bu dəfə bərabərliyə razılaşdı. Bu isə iki komandanı üstələməyə kifayət etdi.
Əslində, “Qəbələ” ilə qarşılaşma elə alındı ki, hər iki komanda qələbə qazana bilərdi. Qarşılıqlı hücumlara səhnə olan matç sürətli, barışmaz mübarizə şəraitində keçdi. Bəlkə də qonaqlar Adil Nağıyevin səhvindən sonra hesabı açmasaydı, belə açıq futbol izləməyəcəkdik. Dönüş etmək üçün hücuma üstünlük verməyə məcbur olan meydan sahibləri fasilədən həmən sonra ardıcıl iki qol vurmaqla vəziyyəti dəyişdi. Tezliklə “Qəbələ” də 2-ci qolu vurdu.
Matçın sonu hər iki tərəfin xoşbəxtliyi rəqib qapısında axtarması ilə yadda qaldı. Lakin hücumlar cərimə meydançası ətrafında zərərsizləşdirildiyindən hesab dəyişmədi. Bu nəticə “Səbail”i son pillədən çıxartdısa, “Qəbələ” 4-cü pillədəki “Zirə”dən 3 xal geri düşdü.
Hər iki komandanın 2-ci qolu zamanı qarşı tərəf narazı qaldı. “Qəbələ” fərqlənərkən “dənizçilər” öncəki aut qərarından narazı idisə, meydan sahibləri qol vurandan öncəki hücum zamanı qonaqlar penalti tələb edirdi. Epizodun ciddi təhlilinə ehtiyac var, lakin deyəsən, əyalət təmsilçisi haqlı idi.
Yeri gəlmişkən, “Qəbələ” hesabı bərabərləşdirərkən artıq iki oyunçu yoldaşlarını əvəzləmək üçün meydanın kənarında gözləyirdi. Həmin anda məhsuldar ötürmə edən Felipe Santos oyundan alıanlardan birinin məhz o olduğunu biləndə buna çox əsəbləşdi.
Hər iki komandanın heyətində ciddi itkilər var idi. Cəzalı və zədəlilər baxımından daha çətin vəziyyətdə olan “Qəbələ”nin matçöncəsi eşitdiyi xəbər qonaqları sevindirdi. Belə ki, oyundan öncəki isinmə hərəkətləri zamanı Franko Mazurekin sıradan çıxması “dənizçilər”in həftəlik hazırlığına ciddi zərbə oldu. Aparıcı oyunçunun yoxluğunda edilən təcili dəyişiklik bəlkə də qələbəyə hesablanan planların üstündən xətt çəkdi.
İstənilən halda, “Səbail” turdan tura daha yaxşı oynamağa başlayır. “Qəbələ” isə ötən tur məğlubiyyətsiz matçlar seriyasına son versə də, yenidən uğursuzluğa düşar oldu. Ölkə kubokunun yarımfinalında rəqib olan bu komandaların ikinci cəbhədəki mübarizəsinin də maraqlı olacağını indidən deyə bilərik.
CAVAD