Azərbaycan kubokunun finalında sürpriz komanda olmayacaq. Yarımfinalda favorit sayılanlar həlledici matça vəsiqəni təmin etdi.
Bir gün öncə “Turan Tovuz”u məğlub edib titul uğrunda son görüşdə iştirak hüququ qazanan “Neftçi”yə “Qəbələ” də qoşuldu. Paytaxt təmsilçisindən fərqli olaraq, bölgə klubu hər iki oyunda qələbə qazandı. Evdə 3:2-yə sevinən Elmar Baxşıyevin yetirmələri Bayılda yeganə qolla kifayətləndi.
Əslində, “Səbail” finala vəsiqəni Qəbələdə 2:0 hesablı qələbəni əldən verəndə uduzmuşdu. Meydan sahibləri geridönüş edərək titulu daha çox istədiyini isbatlamışdı. Premyer Liqada son pillədə olan “dənizçilər” heyətdə rotasiya edərək iki cəbhədə mübarizə aparmağa gücünün çatmadığını “etiraf etmişdi”, nəticəni də bu amil müəyyənləşdirmişdi.
“Səbail”in baş məşqçisi Şahin Diniyev cavab matçında da bəzi oyunçulara istirahət vermişdi. Meydan sahibləri gücünü çempionata saxlayaraq kubokda təsadüfə ümid edirdi. Lakin 47-ci dəqiqədəki epizod meydan sahiblərinin planlarını alt-üst etdi. Vüqar Həsənov həm penaltiyə səbəb oldu, həm də komandasını azlıqda qoydu. İsnik Alimi kimi sərrast futbolçu hədəfdən yayınmayınca matçın taleyi həll olundu.
Paytaxt klubu son dəqiqələrdə daha iki qırmızı vərəqə alıb matçı 8 nəfərlə bitirdi. Lakin həmin qovulmalar olmasa da, vəziyyəti dəyişmək mümkün deyildi. Son oyunlarda çox qol buraxan “Qəbələ” bu dəfə müdafiədə etibarlı oynayıb qələbəni təmin etdi.
İndi “Səbail” fikrini Premyer Liqada yerini qorumağa cəmləyə bilər. Kubokda sürpriz alınmadı, çempionatda da vəziyyət yaxşı deyil. Və təqvimə görə “dənizçilər” yenə “Qəbələ” ilə üz-üzə gəlməlidir. Mayın ilk günündə bölgədə keçiriləcək oyun hər iki komanda üçün önəmlidir. Diniyevin yetirmələri son pillədən qurtulmaq üçün hər xal uğrunda döyüşür, “Qəbələ” isə 4-cü pillədə möhkəmlənmək niyyətindədir. Kuboku qazanmaq üçün şans var, amma bu, alınmayacağı təqdirdə avrokuboklara getmək üçün 4-cü pillədə qalmaq tələb olunur. Ona görə də 3 həftə ərzində baş tutacaq 3-cü duel də gərgin mübarizə vəd edir.
“Neftçi” – “Qəbələ” finalı isə maraqlı mübarizə vəd edir. Mövsümü titulla başa vurmaq istəyən komandalar ili major notda başa vurmaq üçün hər şey edəcək.
AĞA