MBA-da final seriyasının üçüncü oyunu keçirilib. “Denver Naggets” Mayamidə qələbə qazanıb – 109:94.
Qonaqların ulduzu Nikola Yokiç görüşü 32 xal, 21 ribaund və 10 assistlə tamamlayıb və bununla da MBA finalları tarixinə düşüb. Buvaxta qədər heç bir basketbolçu final seriyasında eyni zamanda həm tripl-dabl, həm də dabl dabl-dabl etməmişdi.
Maraqlıdır ki, onun komanda yoldaşı Camal Mürrey də görüşü tripl-dablla başa vurub. Onun aktivində 34 xalla yanaşı 10 ribaund və 10 assist var. Mürreyin bu göstəricisi də unikaldır. Belə ki, indiyədək heç kim final seriyasının ilk 3 oyununda ən azı 10 dəfə məhsuldar ötürmə etməmişdi.
Görüşün sonlarında veteran basketbolçu Yudonis Haslem də 30 saniyə meydançada görünüb. Bununla da o, final seriyasında oynayan ən yaşlı basketbolçu ünvanına sahib çıxıb. Meydan sahiblərinin ulduzu Cimmi Batler oyunu 28 xalla tamamlayıb. Komanda yoldaşı Adebayonun 22 xal və 17 ribaundu var.
Seriyada geriyə düşən “Mayami Hits” növbəti oyunu da doğma meydanda keçirəcək.