Konfrans Liqasının 3-cü təsnifat mərhələsinə vəsiqə qazanan “Neftçi”nin növbəti rəqibi “Beşiktaş”dır. Bununla da klublarımız İstanbul nəhənglərinin hamısı ilə avrokuboklarda qarşılaşmış olacaq.
Futbolinfo.az xəbər verir ki, 1994-cü ildə “Fənərbağça” UEFA Kubokunda “Turan”ı hər iki oyunda (5:0, 2:0) yenmişdisə, 2020-ci ildə “Qalatasaray” Avropa Liqasında “Neftçi”dən ustün olmuşdu. 3 il öncə bir oyundan ibarət olan mərhələnin Bakı Olimpiya Stadionundakı matçı 3:1 hesabı ilə bitmişdi. “Beşiktaş”ın gəlişi ilə bütün İstanbul nəhəngləri ilə qitəmqyslı yarışlarda qarşılaşmış olacağıq.
İlk dəfə 2010-cu ilin iyulunda “Beşiktaş”la üz-üzə gələn “Neftçi” uduzmamışdı. Avstriyada baş tutan yoxlama oyunu 1:1 hesabı ilə bitmişdi. “Neftçi”nin ötən ay Sankt-Peterburqda “Fənərbağça”ya beynəlxalq turnirdə 0:1 hesabı ilə uduzduğunu nəzərə alsaq, bakılılar bütün İstanbul nəhəngləri ilə rəsmi oyunda qarşılaşmış olacaq.
“Beşiktaş”ın mayın 13-də xeyriyyə oyunu üçün Bakıya gəlib “Sabah”la heç-heçə (3:3) etdiyini nəzərə alsaq, istanbullular 3 ay ərzində 2-ci dəfə paytaxtımızda qonaq olacaq. III təsnifat mərhələsinin oyunları 10-17 avqustda reallaşacaq.