Milli Basketbol Assosiasiyası 2023/2024-cü il mövsümünün təqvimini açıqlayıb. Təqvim qurumun rəsmi saytında dərc edilib.
Müntəzəm çempionat oktyabrın 24-də start götürəcək və aprelin 14-dək davam edəcək. Ümumilikdə 1230 oyun keçiriləcək.
Çempionatın ilk görüşü oktyabrın 24-də Denverdə “Nuggets”lə “Los-Anceles Leykers” komandaları arasında olacaq. Həmin gün San-Fransiskoda “Qolden Steyt Vorriors”la “Finiks Sans” qarşılaşacaq. Müntəzəm çempionatın son günü olan aprelin 14-də 30 klubun hamısı meydançaya çıxacaq.
Komandalar 82 oyun keçirəcək. 4-10 dekabr həftəsi üçün planlaşdırılan 30 oyunun dəqiq tarixləri hələ müəyyən edilməyib. Buna da səbəb MBA-nın yeni turniridir. Pley-inn 16-19 aprel tarixində olacaq. Pley-off isə aprelin 20-də start götürəcək. 2023/2024 mövsümündə final seriyasının ilk oyunu iyunun 6-da baş tutacaq.
Yeni mövsümlərarası turnir noyabrın 3-də başlayacaq. Qrup mərhələsinə noyabrın 28-də yekun vurulacaq, 4-5 dekabrda 1/4 finallar, 7-də yarımfinallar, 9-da isə final olacaq. Finaldan başqa bütün matçlar müntəzəm çempionatın turnir cədvəlinə aid ediləcək.
MBA “All-Star Weekend” 16-18 fevral tarixlərinə planlaşdırılıb.