ABŞ-də mötəbər tennis turniri başa çatmaq üzrədir. Kişi və qadınların yarışında finalçılar məlum olub.
“Masters” seriyalı turnirdə kişilərin finalında dünyanın ən güclü iki tennisçisi üz-üzə gələcək. İspaniyalı Karlos Alkaras yarımfinalda polyak Hubert Hurkaçı çətinliklə də olsa, məğlubiyyətə uğradıb – 2:6, 7:6, 6:3. Digər yarımfinal qarşılaşmasında Novak Cokoviç Aleksandr Zverevi iki setdə üstələyib – 7:6, 7:5.
Qeyd edək ki, Alkarasla Cokoviç bu il 4-cü dəfə qarşılaşacaqlar. Bundan əvvəlki 3 oyunun ikisində ispan tennisçi qələbə qazanıb. Alkaras finalın nəticəsindən asılı olmayaraq, reytinq cədvəlində liderliyini qoruyacaq. Serbiyalı idmançı isə finala çıxmaqla ilin yekun turnirində iştirakını təmin edib.
“Sinsinati Open”in qadın turnirində reytinqin liderləri finala adlaya bilməyiblər. Belaruslu Arina Sobolenka çexiyalı Karolina Muxovaya məğlub olub. ABŞ-li Qauf isə dünyanın bir nömrəsi Svyontek üzərində qələbə qazanıb.