“Çelsi” baş məşqçi Mauritsio Poçettinoya vaxt verib. Növbəti 5 matçda komanda böhrandan çıxmasa, argentinalı mütəxəssis işindən qovulacaq.
Futbolinfo.az xəbər verir ki, mövsümə uğursuz başlayan londonluların son turda evdə “Nottingem Forest”ə yenilməsi ilə vəziyyət daha da pisləşib. Lakin Poçettino yetirmələrinin potensialına əmindir: “Belə zamanlar həmişə enişli-yoxuşlu olur. Çox gənc heyətimiz var. Artıq daha çox çalışmaq, futbolçuları heyətə, bir-birinə uyğunlaşdırmaq və ən yaxşı oyun modelimizi tətbiq etmək vaxtıdır.
Poçettino problemin səbəbini bilir: “Qapı önündə daha soyuqqanlı olmalıyıq. Bu komponentdə çatışmazlığımız var və üzərində çox işləməyimiz lazımdır. Qol vura biləcəyini isbatlamağın lazımdır. Zamanı irəli çəkə bilmərik, lakin çox istedadlı futbolçulardan ibarət heyətimiz var, mütləq bacaracağıq”.
Son matçda yaxın məsafədən əla qol şansını qaçıran Nikolas Cekson azarkeşlərin əsas tənqid hədəfidir. Argentinalı mütəxəssis bu hücumçuya da inanmaq gərəkdiyini düşünür: “Onun da zamana ehtiyacı var. Hələ Premyer Liqaya uyğulaşmalıdır. Meydanda əla işlər görür, qol vurması asan deyil, bəzən tələsik qərarlar verir. Əsəblərinə hakim olmalıdır. O, mütləq qolları sıralayacaq”.