Təxminən 11 min iştirakçı Mexikoda keçirilən marafonda məsafənin bir hissəsini kəsdiyi üçün diskvalifikasiya edilib. Ümumilikdə marafonda 30 minə yaxın insan iştirak edib.
Atletlər hər beş kilometrdən bir quraşdırılan qeydiyyat məntəqələrini buraxdıqlarına görə diskvalifikasiya ediliblər. Bəzi idmançıların məsafəni qısaltmaq üçün nəqliyyat vasitələrindən və ya ictimai nəqliyyatdan istifadələri iddia edilir.
Yarış təşkilatçıları qeydiyyat məntəqələrini buraxan atletlərin müəyyən edilməsi və diskvalifikasiyası üçün işləri davam etdirəcəklərini bildiriblər.
Mexiko marafonunda əvvəllər də oxşar problemlər olub. 2017-ci ildə 6000-ə yaxın, 2018-ci ildə isə 3000-dən çox idmançı diskvalifikasiya edilib.
Marafonda boliviyalı Hektor Qaribay Flores kişilər arasında marafonda 2 saat 8 dəqiqə 23 saniyəlik nəticə ilə qalib gəlib ki, bu da əvvəlki yarış rekordunu iki dəqiqədən çox üstələmək deməkdir.
Qadınların yarışında 2:27:17 nəticə ilə keniyalı Selestina Çepçirçi qələbə qazanıb.