“Arsenal”ın qapıçısı David Raya baş məşqçi Mikel Artetanın digər qolkiper Aaron Ramsdeyli ehtiyat oyunçular skamyasında saxlamaq qərarına münasibət bildirib. Yayda komandaya gələn ispan əlcək sahibi öz işini gördüyünü bildirib.
Futbolinfo.az xəbər verir ki, 28 yaşlı qapıçı əsas heyətdə meydana çıxmasının baş məşqçinin qərarı olduğunu deyib: “Bu, Artetanın qərarıdır, mənim deyil. Ramsdeyl qayıtsa, komanda üçün mübarizə aparmalı və qələbə qazanmağa kömək etməlidir. Hamımız məhz bunu edirik. Məncə, ilk dəfədir ki, eyni komandada iki yüksək səviyyəli qapıçı çıxış edir. Rəhbərlik hər mövqe üçün iki oyunçuya sahib olmağa qərar verib, məşqçi də rotasiya prinsipi ilə hamıya şans verir. Son iki matçda oynadım, bazar günü nə olacağını bilmirəm”.
İspan qolkiperin əsas heyətdə meydana çıxdığı oyunlarda “Arsenal” Premyer Liqada “Everton”u (1:0), Çempionlar Liqasında isə PSV-ni (4:0) məğlub edib. Ötən mövsüm əsas qapıçı olan Ramsdeylin bu durumdan narazı olduğu deyilir.