2021-ci ildə “Netflix” yeddiqat dünya çempionu Mixael Şumaxerin karyerası və həyatından bəhs edən sənədli filmi təqdim etmişdi. Film həm ictimaiyyət, həm də tənqidçilər tərəfindən yüksək qiymət almışdı.
Bununla belə, müxtəlif rejissorlar və studiyalar məşhur pilot haqqında öz filmlərini çəkməyə davam edirlər. Bunlardan da biri Andreas Trollun rejissoru olduğu “Mixael Şumaxer olmaq” sənədli serialıdır. Bu serial dekabrda Almaniyada nümayiş olunacaq. Beş seriyadan ibarət olacaq film Mixaelin kartinqdən avtoidman əfsanəsinə çevrilməsini anladacaq.
Serialın çəkilişləri zamanı həm Mixaelin dostları və qohumlarından, həm də rəqiblərindən çoxsaylı müsahibələr alınıb. Onlar arasında Devid Kulthard, Fernando Alonso, Lyuis Həmilton, Norbert Hauq, Ross Braun və Jan Todt var. Bundan əlavə, serialda yeddiqat dünya çempionunun şəxsi arxivindəki kadrlardan istifadə olunub.
“Mixael Şumaxer olmaq” serialı Fransadakı Alp dağlarında baş vermiş faciənin on illiyinə həsr edilir.