Bu gün kişi voleybolçular arasında Azərbaycan çempionatında növbəti oyun keçirilib.
Futbolinfo.az xəbər verir ki, “Murov”un idman zalında baş tutan görüşdə MOİK və “Xarı Bülbül Şuşa” komandaları üz-üzə gəlib.
Oyun Şuşa təmsilçisinin qələbəsi ilə başa çatıb. Gərgin keçən ilk hissədə 27:25 hesabı ilə MOİK komandası qalib gəlsə də, sonraki üç hissə “Xarı Bülbül Şuşa”nın üstünlüyü ilə yekunlaşıb. Beləliklə, bugünkü qələbədən sonra xallarının sayını 6-ya çatdıran Şuşa təmsilçisi turnir cədvəlində ikinci pilləyə yüksəlib.
Turnir cədvəlinə 8 xalla “Azərreyl” başçılıq edir. “Xarı Bülbül Şuşa” 6 xalla ikinci, “Murov Az Terminal” 5 xalla üçüncü, hərəyə 4 xal toplamış “Neftçi” və “Xarı Bülbül Laçın” klubları dördüncü və beşinci yerləri bölüşürlər. Sonuncu pillədə olan MOİK-in isə xalı yoxdur.
MOİK – “Xarı Bülbül Şuşa” 1:3 (27:25, 22:25, 22:25, 17:25)