Son bir neçə gün ərzində xəbər saytları və sosial şəbəkələr “Barselona”dakı fenomendən danışırlar. Əslən Burkina-Fasodan olan 12 yaşlı basketbolçu U-15 turnirlərində dominantlıq edir.
12 yaşı olmasına baxmayaraq, fenomenin boyu 205 sm-dir. Məhəmməd Dabone yaşıdlarından hündür olması ilə bərabər oyun keyfiyyətləri ilə də seçilir. Boyundan istifadə etməklə blok-şotlarda statistikasını yüksək həddə çatdıran basketbolçu üçxallıq atışları ilə də diqqəti çəkir.
Təqdim etdyimiz videoda Dabone U-15 liqasında komandasını çempionluğa daşıyıb. Əzəli rəqib olan Madrid “Real”ı 61:59 hesabı ilə məğlubiyyətə uğradılıb. Dabone oyunda 25 xal toplayıb.
12 yaşlı basketbolçunu indidən draftın 1 nömrəsi sayırlar. Lakin nəzəri cəhətdən o, MBA-ya 2031-ci ildə düşə bilər. Ona qədər isə bir neçə ildən sonra Daboneni “Barselona”nın əsas heyətində görə bilərik.
Katalon klubunun akademiyası gənc basketbolçuları yetirib MBA-ya göndərməkdə məşhurdur. İlk növbədə ağla gələn isimlər Qazol qardaşlarıdır. “Barselona” klubunun məktəbindən çıxan qardaşlar MBA-da böyük karyera qurmaqla çempion olmağı da bacarıblar. Lakin okeanın o tayına gedənə qədər onlar “Barsa”nın heyətində çıxış etməmişdilər. Böyük qardaş Poul MBA karyerasını bitirdikdən sonra doğma klubuna minnətdarlığını nümayiş etdirərək geri dönmüşdü. Təəssüf ki, onun “Barselona” ilə Avroliqanı qazanmaq arzusunun qarşısını Ergin Atamanlı “Anadolu Efes” alıb.