Dünən keçirilən oyunda “Real” daha bir futbolçusunu itirib. Bu mövsüm üçüncü dəfədir ki, komandanın futbolçusu xaçvari bağlardan zədə alıb. Avstriyalı müdafiəçi David Alaba artıq bu mövsüm komandasına yardım edə bilməyəcək. Bundan başqa o, yaydakı Avropa çempionatını da buraxacaq.
Daha öncə Militaonu da itirən madridlilər Alabanın əvəzinə futbolçu gətirməyi planlaşdırırlar. Belə ki, komandada cəmi iki mərkəz müdafiəçisi qalıb. Böyük ehtimalla yanvarda bir mərkəz müdafiəçisi heyətə cəlb ediləcək. Bu, həm daimi əsasda, həm də icarə ilə ola bilər.
Hazırda bir neçə variant müzakirə edilir. Adları çəkilən futbolçular isə Qonsalo İnasio, Antonio Silva və Skalvinidir. Portuqaliyanın “Sportinq” klubunda çıxış edən İnasionun transfer dəyəri 60 milyon avrodur. Lakin portuqaliyalılar qiymətdə razılaşa biləcəklərini bildiriblər. Solaxay olan gənc müdafiəçi boş qalan mövqeyə daha uyğun namizəd hesab edilir.
Antonio Silvanın transfer dəyəri 45 milyondur. Fiziki göstəriciləri İnasiodan daha yaxşıdır. Lakin müdafiəçinin əsas işlək ayağı sağdı.
Digər namizəd isə artıq İtaliya millisinə dəvət alır. 194 sm boya malik Corcio Skalvininin transfer dəyəri 50 milyondur. “Atalanta”da oynayan futbolçu A seriyasının əsas istedadlarından hesab edilir.
Madridlilər Bundesliqaya da nəzər yetirirlər. “Ayntraxt”da çıxış edən Paço komandanın əsas hədəflərindəndir. 11 milyon avroya transfer edilən 21 yaşlı futbolçu da solaxaydır və hazırda 40 milyon avroya dəyərləndirilir. Villian Paço Ekvador milli komandasının üzvüdür.