“Qəbələ”nin israilli yarımmüdafiəçisi Feras Abu Akalın futbolinfo.az saytına müsahibəsi
– Uzun müddət sonra komanda ilə məşqlərə qoşuldun. Vəziyyət necədir?
– Çox sevinirəm ki, bu ağır zədədən sonra komandama geri döndüm. Komanda yoldaşlarımla məşq etmək məni sevindirir. Hər şeyin daha yaxşı olmasını arzulayıram.
– Nə zaman oynamağa hazır olacaqsan?
– Tezliklə çempionat matçlarında meydana çıxmağa hazır olacam. Əminəm ki, uzun müddət kənarda qalmağıma baxmayaraq, komandama kömək edəcəm.
– “Qəbələ”nin vəziyyəti heç də yaxşı deyil. Təlim-məşq toplanışı Premyer Liqanın ikinci yarısında daha yaxşı olmağa ümid yaradır?
– Məşqlər çox yaxşı keçdi. Mən komandama inanıram. Çempionatın ikinci yarısında daha yaxşı şeylər edəcəyimizə, son pillələrdən xilas olacağımıza ümid edirəm. Bunun üçün potensial və keyfiyyətimiz var.
– Bunun üçün sizə nə lazımdır?
– Hər şey açıq olaraq qalır və heç nə bitməyib. Bizim hələ qarşıda 18 oyunumuz var. Gücümüzə, qüvvəmizə inanıram və biz yuxarı yerlərə qalxacağıq.
– Nə zaman tam olaraq öz performansına qayıdacaqsan?
– İnşallah, növbəti ay tam hazır olacam və bütün gücümlə oynaya biləcəm.
– Komanda yalnız bir transfer edib keçmiş futbolçusu Klesio Bauku heyətə qaytardı. Əvəzində Omar Hani klubdan ayrıldı. Bu cür vəziyyət çətinlik yaratmayacaq?
– Omar bizim üçün vacib oyunçu idi. Ona yeni komandasında uğurlar arzulayıram. Amma Bauk da bizim üçün yaxşı işlər görəcək. Heyətimizə güvənirəm.
– Çempionata “Sumqayıt”la oyunla başlayacaqsınız…
– Bu matçda qələbə bizim üçün çox vacibdir.
AĞA