MBA-da bu gecə 8 oyun keçirilib. Bu oyunlar arasında “Dallas Maveriks”in evdə “Finiks Sans”a böyük hesabla məğlubiyyətini qeyd etmək lazımdır – 109:132. Meydan sahiblərinin sloveniyalı basketbolçusu oyunda 32 xal toplayıb. Qonaqların heyətində isə Buker 46 xal yığıb.
“Miluoki Baks” Eduard Qriffinin istefasından sonra ilk oyununda qələbə qazanıb. Onlar “Klivlend Kavalers”dən üstün olublar – 126:116. Yannis Antetokumbo oyunu tripl-dablla tamamlayıb. Onun aktivində 36 xal, 18 ribaund və 10 asist var.
Alperen Şengünün növbəti tripl-dablına isə 2 asist çatmayıb. Türkiyəli basketbolçu “Portlend Treyl Bleyzers”lə qarşılaşmada 30 xal, 10 ribaund və 8 asistlə oynayıb. “Hyuston Rokets” isə overtaymda 131:137 məğlub olub.
“Mayami Hits”in “Memfis Qrizliz”lə qarşılaşmasında qonaqlar qalib gəliblər – 105:96. “San Antonio Spörs” isə növbəti məğlubiyyəti ilə üzləşib. Onlar evdə “Oklahoma-Siti Tander” qarşısında aciz qalıblar – 109:140. Çempionatın digər autsayderi isə bu dəfə qələbə qazanıb. Detroyt komandası evdə “Şarlott Hornets”dən 113:106 hesabı ilə üstün olub. Boqdanoviç oyunu 34 xalla tamamlayıb.