“Qarabağ” Misli Premyer Liqasında növbəti oyununa bu gün çıxacaq.
Futbolinfo.az xəbər verir ki, sözügedən komanda 21-ci turun matçında “Səbail”lə görüşəcək.
Qurban Qurbanovun baş məşqçisi olduğu komanda səfərdə “Səbail”lə qarşılaşacaq. Bu, rəqiblər arasında ölkə çempionatlarında 26-cı görüş olacaq.
“Səbail”lə ilk dəfə 2017/18 mövsümündə qarşılaşan “Qarabağ” bu rəqiblə 25 dəfə üz-üzə gəlib. Əvvəlki oyunlarda Ağdam təmsilçisi böyük üstünlüyə malikdir.
20 qələbəsi olan “Qarabağ” 2 heç-heçə edib və 3 dəfə meydanı xalsız tərk edib. Texniki nəticə nəzərə alınmamaqla top fərqində də böyük üstünlük var – 54-11.
“Qarabağ” səfər matçlarında da üstündür. “Qarabağ” əvvəlki 13 oyunun 9-da qalib gəlib. İki heç-heçəsi olan komanda eyni sayda görüşdən xalsız ayrılıb. Qurbanovun yetirmələri səfərdə 25 qol vurub və yalnız 8 top buraxıb.
Fevralın 3-də “ASCO Arena”da keçiriləcək “Səbail” – “Qarabağ” matçına saat 15:00-da start veriləcək.