MBA-da bu gecə 6 oyun keçirilib. Ən yaddaqalan hadisə Stiv Körrinin məhsuldarlığıdır. “Qolden Steyt Vorriors”un lideri 60 xal toplayıb.
Bu hadisə “Atlanta Houks”la səfər matçında baş verib. Oyunun qalibi isə overtaymda müəyyənləşib. Meydan sahibləri 141:134 hesabı ilə qələbə qazanıblar. Bu məğlubiyyət “Vorriors”un turnir cədvəlində vəziyyətini bir qədər də çətinləşdirib. Hazırda onlar 10-cu yerdən 4 qələbə uzaqdadırlar.
Pley-inə düşmək uğrunda mübarizə aparan digər komanda “Los-Anceles Leykers” isə səfərdə qalib gəlib. Kaliforniyalılar “Nyu-York Niks”i 113:105 hesabı ilə məğlubiyyətə uğradıblar. Lebron Ceyms görüşü 24 xalla tamamlayıb.
“Dallas Maveriks” isə “Miluoki Baks”la bacarmayıb. Qonaq komandanın lideri Yannis Antetokumbo 48 xal toplayıb. Demian Lillard da 30 xalla Yannisin məhsuldarlığına dəstək olub. Dallaslıların lideri Luka Donçiçin aktivində 40 xal var.
“San Antonio Spörs” növbəti məğlubiyyəti ilə üzləşib. Autsayder evdə “Klivlend Kavalers”ə uduzub. Meydan sahiblərinin türk basketbolçusu Cedi Osman 8 xal toplayıb. “Filadelfiya Siksers” də Coel Embiidin yoxluğunda qalib gələ bilməyib. Onlar “Bruklin Nets”ə məğlub olublar. “Sakramento Kinqs” isə Çikaqo səfərindən qələbə ilə dönüb.