MBA-da bu gecə 13 oyun keçirilib. “Hyuston Rokets”in səfər uğursuzluqları davam edir. Texas təmsilçisi bu dəfə elə də güclü olmayan “Memfis Qrizliz”ə məğlub olub – 113:121. Türkiyəli Alperen Şengünün göstəriciləri 19 xal və 6 ribaunda bərabərdir. O öz komandasının heyətində ən məhsuldar basketbolçu olub.
Gözlənilidiyi kimi, Bostonda meydan sahibləri “Bruklin Nets”ə qalib gəliblər – 136:86. “Mayami Hits” də ardıcıl ikinci önəmli qələbəsini qazanıb. Floridalılar səfərdə “Filadelfiya Siksers”dən 109:104 hesabı ilə üstün olublar.
Son çempion “Denver Naggets” ardıcıl ikinci dəfə “Sakramento Kinqs”ə məğlub olub – 98:102. Matçın ulduzu 30 xal toplayan Foks olub . MVP olmağa əsas namizəd Nikola Yokiç isə cəmi 15 xal toplamağı bacarıb.
“Finiks Sans”ın da uğurlu seriyası davam edir. Bu dəfə evdə autsayder “Detroyt Pistons” 116:100 hesabı ilə məğlub edilib. Son oyunlarda ardıcıl 5 qələbə qazanaraq pley-in zonasına düşən “Qolden Steyt Vorriors” bu dəfə evdə “Los-Anceles Klippers”ə məğlub olub – 117:121. Ceyms Hardenin sərbəst atışlarından sonra matçın müqəddəratı həll edilib. Meydan sahiblərinin lideri Stiv Körri oyunda 41 xal toplayıb.
Şərq konfransında ikinci pillədə qərarlaşan “Klivlend Kavalers” evdə “Çikaqo Buls”dan üstün olub – 108:105. Lebron Ceymsin istirahət etdiyi oyunda isə “Leykers” səfərdə “Yuta Caz”ı 138:122 hesabı ilə məğlubiyyətə uğradıb.