Misli Premyer Liqasında 3-cü dövrə komandalar üçün fərqli başlayıb. Mövsümün ilk yarısını əla keçirən bəzi komandalar enişə keçibsə, əks qrafik cızanlar da var.
Ümumiyyətlə, 2024-cü ildə 3 komanda məğlubiyyət görməyib. Qələbə həsrətində olan iştirakçıların sayı isə 2-dir. Yalnız bir komanda heç-heçə etməyib.
Hələlik 5 turu geridə qalan 3-cü dövrədə “Qarabağ”la “Qəbələ” digərlərindən az oyun keçirib. Amma buna baxmayaraq, ağdamlılar yenə də qışdan sonrakı dövrün turnir cədvəlinə başçılıq edir. Qurban Qurbanovun yetirmələri yalnız yüksəlişdə olan”Sabah”ı məğlub edə bilməyib.
Məğlubiyyətsiz oyunlar seriyası davam edən “Sumqayıt”la yanaşı “Turan Tovuz” da yeni ilə yaxşı başlayıb. “Neftçi” və digər komandalar isə mümkün xalların yarısından azını toplayıb. Ən bərbad durumda olan autsayder “Qəbələ”dirsə, 10 oyundur qələbə görməyən “Zirə”nin enişi də vurğulanmalıdır.
“Sumqayıt” cəmi 2 qol buraxması ilə öyünürsə, “Kəpəz” 11 dəfə məyus olub. Amma topların ən pis mənfi saldosu “Qəbələ”dədir. “Qarabağ” 4 oyun keçirməsinə baxmayaraq, 10 qolla hamıdan məhsuldar kollektivdir. Ağdamlılar vurulan və buraxılan topların fərqində də hamını qabaqlayır. “Zirə” isə 2024-cü ildə çempionat matçlarında cəmi 1 dəfə fərqlənib.
| Qarabağ | 4 | 3 | 1 | 0 | 10-6 | 10 |
| Sabah | 5 | 2 | 3 | 0 | 8-6 | 9 |
| Sumqayıt | 5 | 2 | 3 | 0 | 4-2 | 9 |
| Turan Tovuz | 5 | 2 | 2 | 1 | 7-5 | 8 |
| Neftçi | 5 | 2 | 1 | 2 | 5-4 | 7 |
| Kəpəz | 5 | 2 | 0 | 3 | 9-11 | 6 |
| Səbail | 5 | 1 | 2 | 2 | 8-8 | 5 |
| Araz-Naxçıvan | 5 | 1 | 2 | 2 | 6-9 | 5 |
| Zirə | 5 | 0 | 3 | 2 | 1-3 | 3 |
| Qəbələ | 4 | 0 | 1 | 3 | 3-7 | 1 |