“Kəpəz”in gürcü yarımmüdafiəçisi Mate Kvirkviyanın futbolinfo.az saytına müsahibəsi
– Söhbətə Misli Premyer Liqasının XXIII turunda “Sabah”a uduzduğunuz (2:3) oyundan başlayaq. Hesabı açan tərəf olsanız da, üstünlüyünüzü qoruya bilmədiniz və yekunda məğlubiyyətlə üzləşdiniz. Bu görüşdən sərfəli nəticə ilə ayrılmaq üçün nə çatmadı?
– Son 2 turda eyni ssenari yaşanır. “Səbail”lə görüşdə olduğu kimi, bu dəfə də hesabı biz açdıq. Amma yenə də üstünlüyü əldən verdik və sonda xalsız qaldıq. Fikrimcə, bunun səbəbi həddindən artıq özünəinam və konsentrasiyanı itirməyimizdir. Dediyim məqamların üzərində çalışmalı, bunları aradan qaldırmalıyıq.
– “Kəpəz”in qış fasiləsindən sonra göstərdiyi nəticələri ümumilikdə necə dəyərləndirirsiniz?
– Ümumilikdə müsbət qiymətləndirirəm. Amma hələ heç nə həll olunmayıb. Qarşıda çoxlu oyun var. Buna görə də var gücümüzlə işləməyə davam etməliyik.
– Çempionatda növbəti oyunu turnir cədvəlində qabaqladığınız yeganə komandaya – “Qəbələ”yə qarşı keçirəcəksiniz. Bu görüşdən 3 xalla ayrıla biləcəksiniz?
– Bilirik ki, bu oyun həm “Kəpəz”, həm də “Qəbələ” üçün finala bərabərdir. Buna görə də mən gərgin və möhtəşəm futbol gözləyirəm. Meydana ancaq qələbə üçün çıxacağıq. Buna nail olmaq üçün əlimizdən gələni əsirgəməyəcəyik.
– “Kəpəz”in qış fasiləsində heyətinə qatdığı futbolçular haqda hansı fikirdəsiniz? Onlar komandanızı gücləndirə biliblər?
– Yeni transferimiz Amil Yunanov özünü doğruldur. Amil çox yaxşı futbolçudur, biz ona inanırıq. Camal Cəfərov haqda da xoş sözlər deyə bilərəm. Camal gənc və istedadlı oyunçudur.
– “Kəpəz” cari mövsümdə qarşısına qoyulan, Premyer Liqada qalmaq tapşırığının öhdəsindən gələ biləcəkmi?
– Bəli, gələ biləcək. Sizi əmin edirəm ki, “Kəpəz” Premyer Liqadan düşməyəcək. Buna imkan verməyəcəyik.
– “Kəpəz”in aparıcı futbolçularından sayılırsınız. Azərbaycan digər klublarından və ya başqa ölkələrdən təkliflər almısınız?
– İndiki məqamda məni ancaq “Kəpəz” maraqlandırır. Bütün diqqətimi komandamın çıxışına yönəltmişəm. Gələcəkdə necə olacağını zaman göstərəcək. “Kəpəz”də xoşbəxtəm.
– Azərbaycan çempionatında bir çox müdafiəçilərə qarşı oynamısınız. Onların arasında kimi ən təhlükəli sayırsınız? Hansı müdafiəçiyə qarşı oynayanda daha çox çətinlik çəkirsiniz?
– Dediyiniz kimi, Azərbaycan Premyer Liqasında xeyli sayda müdafiəçi ilə qarşılaşmışam. Ancaq onların arasında xüsusi olaraq bir nəfəri vurğulaya bilərəm. Bu, “Qarabağ”da çıxış edən Kevin Medinadır. Üz-üzə gəldiyimiz oyunlarda mən ona heç nə edə bilməmişəm (gülür).
AĞA