“Turan Tovuz”un braziliyalı hücumçusu Aleks Souzanın futbolinfo.az saytına müsahibəsi
– Söhbətə Misli Premyer Liqasının XXIV turunda “Neftçi” ilə keçirdiyiniz oyundan (1:1) başlayaq. Sərgilədiyiniz futbol və qazandığınız 1 xal ürəyinizcə oldu?
– Matç çətin keçdi. Güclü komandaya qarşı oynadıq. Həm bizim, həm də “Neftçi”nin qol imkanları oldu. Meydana 3 xal qazanmaq üçün çıxmışdıq. Amma göstərdiyimiz oyun bunun üçün yetərli olmadı. Heç-heçə də pis nəticə deyil. Mövsümün sonunda bu xal bizim işimizə yaraya bilər.
– Qısa zamanda yeni komandanıza uyğunlaşdınız və “Turan Tovuz”un aparıcı oyunçularından birinə çevrildiniz. Bunu necə bacardınız?
– Bunun səbəbkarı baş məşqçidir. Ayxan Abbasov əla kollektiv formalaşdırıb, komandada gözəl atmosfer yaradıb. “Turan Tovuz”a gəldiyim ilk gündən gördüm ki, klubda çalışan hər kəs, bütün futbolçular əsl peşəkardırlar və bir-birlərinə hörmətlə yanaşırlar. Burada hər kəs mənə dəstək olur və inanır. Özümü evimdəki kimi hiss edirəm.
– Ayxan Abbasovda bəyəndiyiniz başqa hansı xüsusiyyət var?
– Onunla oxşar xüsusiyyətlərimiz çoxdur. Baş məşqçi mənə özünəinam hissi verir. Abbasov əsl peşəkardır, onda qalib ruhu var. Mənim üçün bu, çox önəmli xüsusiyyətdir. Buna görə də Abbasovla birgə işlədiyim üçün xoşbəxtəm. Onun uğurlu olması üçün digər futbolçular kimi, mən də əlimdən gələni edirəm.
– Qış fasiləsindən sonra “Turan Tovuz”un ümumi çıxışını necə dəyərləndirirsiniz?
– Komandada hər şey qaydasındadır. Oyundan-oyuna inkişaf edirik. Təbii ki, bununla kifayətlənmək olmaz. Daha yaxşı oynamağa çalışmalıyıq. İndiki halda işimiz pis getmir.
– Növbəti turda sizi “Zirə” ilə matç gözləyir. Bu görüşdən hansı nəticəni gözləyirsiniz?
– Nəticə yaxşı iş görəndə gəlir. Oyuna çox ciddi hazırlaşırıq. Görüşə qələbə qazanmaq üçün çıxacağıq. Buna nail olmaq üçün bütün gücümüzü meydanda qoymalı olduğumuzu dərk edirik.
– Azərbaycan çempionatının səviyyəsi bir futbolçu olaraq sizi tam qane edir? Çempionatımızda bəyəndiyiniz və bəyənmədiyiniz məqamlar hansılardır?
– Çempionatın səviyyəsi yaxşıdır, burada keyfiyyətli futbolçular çıxış edir. Premyer Liqada yaxşı oyunçuların çox olması mənim də ürəyimcədir. Çünki rəqabət aparmaq xoşuma gəlir. Azərbaycan çempionatında həm komandalar, həm də futbolçular arasında rəqabət yüksək səviyyədədir.
– “Turan Tovuz”da hansı futbolçu ilə meydanda bir-birinizi daha yaxşı başa düşürsünüz?
– İnanın ki, bütün komanda yoldaşlarımla oynamaq mənim üçün rahatdır. Meydanda bir-birimizi çox yaxşı anlayırıq. Biz bir ailəyik.
CAVAD