MBA-da bu gecə 6 oyun keçirilib. Nikola Yokiç ardıcıl 4-cü oyunda tripl-dabl edib. “Denver Naggets” bunun sayəsində “Sakramento Kinqs”i evə əliboş göndərib – 117:96. Qonaqların litvalı basketbolçusu Domantas Sabonis bu dəfə dabl-dablla kifayətlənib.
Ən maraqlı oyun Los-Ancelesdə baş tutub. Şəhərin derbisində “Leykers” 116:112 hesabı ilə qələbə qazanıb. Derbinin qəhrəmanı Lebron Ceyms olub. Veteran basketbolçu 34 xalla görüşdə hamıdan çox xal toplayıb.
“Çikaqo Buls”la “Klivlend Kavalers” oyunun taleyi ikinci overtaymda həll edilib. Meydan sahibləri gərgin oyund qələbəni bayram edə biliblər – 132:123. Demar Derozan 35 xal toplayıb. Qonaqların heyətində Mobli 25 xalla oynayıb.
“Minnesota Timbervulvs” evdə “Memfis Qrizliz”dən üstün olub – 110:101. Edvardsın aktivində 34 xal var.
Gecənin ən məhsuldar oyunu Kanadada baş tutub. “Dallas Maveriks” səfərdə 136:125 hesabı ilə qələbə qazanıb. Luka Donçiçin aktivində tripl-dabl var. Sloveniyalı basketbolçu 30 xaldan əlavə, 11 ribaund və 16 asist edib.