MBA-da bu gecə 7 oyun keçirilib. Ən maraqla gözlənilən oyun son çempionla hazırkı lider arasında olub. Nikola Yokiçin tripl-dablı (32 xal, 12 ribaund , 11 asist) “Denver Naggets”ə qələbə qazandırıb – 115:109. Boston komandasının heyətində Ceylen Braun 41 xal toplayıb.
Daha bir tripl-dabl Dallasda qeydə alınıb. Luka Donçiç “Mayami Hits”lə qarşılaşmada 35 xaldan əlavə 11 ribaund və 11 də məhsuldar ötürmə edib. “Maveriks” isə görüşü 114:108 hesablı qələbəylə bitirib.
Autsayder “Detroyt Pistons” doğma arenada “Bruklin Nets”i məğlubiyyətə uğradıb – 118:112. “Sakramento Kinqs” isə digər bir autsayder “San Antonio Spörs”ə 131:129 hesabı ilə qalib gəlib. Domantas Sabonisin tripl-dabl etməsinə bir asist çatmayıb. Qonaq komandanın türkiyəli basketbolçusu Cedi Osman 2 xal toplayıb.
“Qolden Steyt Vorriors” doğma arenada “Çikaqo Buls”a məğlub olub – 122:125. Ən acınacaqlısı isə komandanın lideri Stiv Körrinin zədələnməsi olub. Pəncəsindən aldığı zədə ucbatından veteran basketbolçu oyunu sona qədər başa vura bilməyib.