MBA-da bu gecə 13 oyun baş tutub.
Pol Corcun matçın sonuna 7 saniyə qalmış dəqiq atışı “Los-Anceles Klippers”ə “Klivlend Kavalers” üzərində qələbəqazandırıb – 120:118. Pol oyunu 39 xal, 11 ribaundla tamamlayıb.
“Hyuston Rokets” bu gecə Dallasda overtaymda məğlub olub. “Maveriks”ə 136:147 hesablı məğlubiyyət “Rokets”in pley-in şanslarının üzərindən rəsmi olaraq xətt çəkib. Görüşün ən məhsuldar oyunçusu meydan sahiblərinin müdafiəçisi Kayri İrvinq olub. Onun aktivində 48, komanda yoldaşı Luka Donçiçin isə 37 xal var.
“İndiana Peysers” Mayami təmsilçisini evə məğlubiyyətlə (119:117) yola salıb. “Boston Seltiks” isə rahat şəkildə “Portlend Treyl Bleyzers”ə qalib gəlib – 124:107.
Qərb konfransında pley-offun son pilləsi uğrunda mübarizə aparan “Finiks Sans” və “Nyu-Orlean Pelikans” qarşılaşmasında qonaqlar vacib qələbə (113:105) qazanıblar. “Leykers” doğma arenada “Minnesota Timbervulvz”la bacarmayıb – 117:127. Qonaqlar bu qələbə sayəsində konfransda liderliyi davam etdirir. Meydan sahiblərinin ulduzu Entoni Devis isə ilk dəqiqələrdə gözündəki zədəni ciddiləşdirərək meydançanı tərk edib.