“Araz-Naxçıvan” klubunun yeni baş məşqçisi Elmar Baxşıyevin futbolinfo.az saytına müsahibəsi
– “Araz-Naxçıvan”a təyinatınız necə baş tutdu?
– Komandanın potensialına bələdəm. “Qəbələ”ni çalışdırdığım müddətdə cari mövsümdə “Araz-Naxçıvan”la həm rəsmi, həm də yoxlama oyunlarında dəfələrlə qarşılaşmışıq. Bu mənada, Naxçıvan klubunun oyunçularını bir növ tanıyırdıq. Təklif gəldi, rəhbərlik kömək etməyimizi istədi. Burada uzun-uzadı düşünməyə ehtiyac yox idi. Razılıq verdim və anlaşma baş tutdu.
– “Qəbələ”dən ayrıldıqdan sonra işsiz günlərinizin belə qısa çəkəcəyini gözləyirdiniz?
– Məşqçi hər zaman yeni çağırışlara hazır olmalıdır. Karyeramda yeni mərhələyə qədəm qoyuram. Hazırda “Araz-Naxçıvan”dayam və komandanın uğur qazanması üçün əlimdən gələni edəcəyəm.
– Klub rəhbərliyi tərəfindən cari mövsümün son 7 oyununda qarşınıza hansı tapşırıq qoyulub?
– Mümkün qədər komandanı toparlamalı, qarşıdakı oyunlarda nəticələri düzəltməliyik. Dediyiniz kimi, mövsümün sonuna 7 tur qalıb. Əsas məqsəd bu görüşlərdə müsbət nəticə qazanmaqdır. Təbii ki, nəticələr qənaətbəxş olarsa, növbəti sezonda da işimizi davam etdirəcəyik. Həm də bir növ növbəti mövsüm üçün komanda quracağıq. Necə alınacağını zaman göstərəcək.
– Artıq komandaya məşq keçmisiniz. Futbolçuların səviyyəsi ilə bağlı ilkin təəssüratınız necədir? Hazırkı məqamda hansı mövqelərdə çatışmazlıq hiss edirsiniz?
– Bu suala konkret cavab vermək üçün hələ tezdir. Dünən ilk məşqimizə çıxdıq. Zamanla axsadığımız və ya nəticələrin niyə sonradan ürəkaçan olmadığını aydınlaşdıracağıq. Azər müəllim yaxşı komanda qurub, “Araz-Naxçıvan” normal nəticələr də qazanırdı. Sonradan komandanın uğursuzluq zolağına düşməsinin səbəbini tapmağa çalışacağıq. Futbolda uğurlu nəticələr kimi, müəyyən eniş də yaşanır. Bu, hər komandanın başına gələ bilər. Bu vəziyyətdən çıxmaq istəyirik.
– Mövsümün sonunda müqavilənizin “+1 il” bəndi işə düşsə, növbəti mövsümdə qarşınıza konkret hansı tapşırıq qoyulacaq? Yəqin ki, klub rəhbərliyi ilə bu barədə də danışığınız olub…
– Hazırda bütün diqqətimi cari mövsümün son 7 oyununa yönəltmişəm. İlk növbədə, bu matçlarda yaxşı nəticələr əldə etmək istəyirik. Sonrasını zaman göstərəcək.
FƏRİD