“Kəpəz” klubunun yarımmüdafiəçisi Elmir Tağıyevin futbolinfo.az saytına müsahibəsi
– Misli Premyer Liqasının 29-cu turunda “Araz-Naxçıvan” üzərində səfər qələbəsi qazandınız. Oyunla bağlı fikirləriniz necədir?
– “Araz-Naxçıvan”la oyuna həftəboyu çox yaxşı hazırlaşmışdıq. Səfərə qələbə dalınca getmişdik. İstədiyimiz nəticəyə nail olduq. Bunu bacardığımız üçün çox şadam.
– İlk hissə rəqibin hesabda üstünlüyü ilə nəticələnmişdi. Fasilədə baş məşqçi Adil Şükürov sizə hansı tapşırıqları verdi ki, ikinci hissədə vəziyyəti dəyişə bildiniz?
– Bəli, birinci hissəni məğlub durumda bitirdik. Buna baxmayaraq, həvəsdən düşmədik. Fasilədən sonra da istəkli oynadıq. Vəziyyəti dəyişəcəyimizə inanırdıq. Hər bir futbolçumuzda özünəinam hissi var idi. Düşünürəm ki, ikinci hissədə baş məşqçimizin tapşırığını yerinə yetirə bildik və qələbə qazandıq.
– Sonuncu pillədə qərarlaşan “Qəbələ”ni artıq 14 xal qabaqlayırsınız. Hələ də Premyer Liqanı tərk etmək qorxunuz var, yoxsa artıq bu təhlükənin sovuşduğunu düşünürsünüz?
– Biz son ana qədər var gücümüzlə oynayacağıq. Premyer Liqada qalacağımız rəsmiləşəndən sonra da matçlara həminki qaydada çıxacaq, özümüzü yaxşı tərəfdən göstərəcəyik.
– Son qələbə sayəsində “Araz-Naxçıvan”la xal fərqini 2-yə endirdiniz. “Kəpəz”in cari mövsümü hazırkı mövqeyinizdən yuxarı pillələrdə bitirmək şansı nə qədərdir?
– Baş məşqçimizin bizə hər dəfə dediyi söz budur ki, irəliyə baxmalıyıq. Son 7 matçda yaxşı nəticə qazanmaq, turnir cədvəlində yuxarı pillələrə qalxmaq üçün oynayacağıq.
– Cari mövsümdə öz çıxışınız haqda hansı fikirdəsiniz? Oyununuzdan tam razısınız?
– Bu mövsüm çox oynamaq şansım olmadı. Açığı, öz çıxışımı bəyənmədim. Cəza və zədə ilə əlaqədar buraxdığım matçlar oldu. İnşallah, bunu aradan qaldıracağam.
– Növbəti turda “Səbail”in qonağı olacaqsınız. Bu görüşdə hansı nəticəyə ümid edirsiniz?
– “Səbail”lə görüşə də çox yaxşı hazırlaşacağıq. Meydana qələbə üçün çıxacağıq. Var gücümüzdən istifadə edərək, 3 xal qazanmağa və azarkeşlərimizi sevindirməyə çalışacağıq.
– “Kəpəz”i növbəti mövsümdə daha iddialı komanda olaraq görə bilərik?
– Növbəti mövsüm haqda heç nə deyə bilmərəm. İndi ancaq cari mövsümə köklənmişik. Çox istərdim ki, gələn mövsüm “Kəpəz” üçün hər şey daha da yaxşı olsun.
ABBAS