“Sabah” klubunun ispaniyalı müdafiəçisi Con İrasabalın futbolinfo.az saytına müsahibəsi
– UEFA Konfrans Liqasında ilk rəqibiniz İsrail təmsilçisi “Makkabi” (Hayfa) olacaq. Püşkün nəticəsi sizi razı saldı?
– Düzdür, avrokuboklarda zəif rəqib olmur. Amma “Makkabi” bu mərhələdə qarşılaşa biləcəyimiz ən güclü rəqib idi. İstənilən halda, bu komanda ilə oyunlara böyük ambisiya ilə çıxacağıq.
– “Sabah”dan Davit Volkov, Kristian Sebalyos kimi futbolçular ayrıldı. Onların gedişi sizi zəiflədə bilər?
– Hər il olduğu kimi, bəzi oyunçular gəlir, bəziləri isə gedir. Bu, futbolun bir parçasıdır. Aydındır ki, vacib oyunlara kimi heyət tam komplektləşməlidir. Əminəm ki, gücləndirməli olduğumuz mövqelərə keyfiyyətli futbolçular gətiriləcək.
– Hazırkı “Sabah”ın gücü Konfrans Liqasında neçə mərhələ adlamağa çatar?
– Mənim istəyim qrup mərhələsində iştirak etməkdir. Amma hamı bilir ki, burada qarşılaşacağımız rəqiblərin səviyyəsi də böyük rol oynayır. İstənilən halda, təslim olmamaq, sona kimi mübarizə aparmaq lazımdır.
– Son mövsümdə avrokuboklara vəsiqə uğrunda gərgin mübarizənin şahidi olduq. Sizcə, növbəti mövsümdə də eyni hal təkrarlanacaq?
– Son mövsümdə çox çətin oldu. Çünki komandalar arasında fərq olduqca az idi. Növbəti mövsümdə avrokuboklara daha rahat vəsiqə qazanmaq üçün öz üzərimizdə çalışmalı, daha da inkişaf etməliyik.
– “Sabah” növbəti mövsümdə “Qarabağ”la çempionluq mübarizəsi apara bilərmi?
– Məncə, bu barədə danışmaq bir qədər tezdir. İndi yalnız qarşıdakı matçlara köklənməliyik. Çempionatdan öncə bizi Konfrans Liqasında vacib oyunlar gözləyir.
– Azərbaycan Premyer Liqasında öz mövqeyinizdə ən bəyəndiyiniz futbolçu kimdir?
– Öz mövqeyimdə ən yaxşı futbolçu kimi “Qarabağ”ın müdafiəçisi Kevin Medinanın adını çəkə bilərəm. O, çox yaxşı fiziki keyfiyyətlərə malikdir.
– Bəs çempionatımızda sizə ən çox çətinlik yaradan hücumçu kimdir?
– Ən çox problem yaradan hücumçular kimi “Turan Tovuz”un üzvlərini qeyd edə bilərəm.
ABBAS