Türkiyənin “Tuzlaspor” klubundan ayrılan Bəxtiyar Həsənalızadənin vəyənə dönmək ehtimalı böyükdür. Təcrübəli mərkəz müdafiəçisi ilə 4 klubumuz maraqlanır. Amma “Sumqayıt”, “Səbail” və “Kəpəz”lə müqayisədə onun “Araz-Naxçıvan”da görünmək ehtimalı daha yüksəkdir.
– Hazırda karyeranla bağlı vəziyyət necədir?
– Sakitçlikdir. İndi özüm ölkə xaricindəyəm, dincəlirəm. Komanda məsələsini istirahətdən qayıdandan sonra həll etməyi düşünürəm.
– Ötən mövsümü keçirdiyin “Tuzlaspor”la bağlı problemlərin olduğu deyilir…
– Bəli, orada bəzi məsələlər hələ də açıq qalır. Amma demək olar ki, komandadan ayrılmışam. Sadəcə, məsələnin rəsmi tərəfi qalıb.
– Konkret olaraq problem nədir?
– Komandanın mənə borcu var.
– Nə zaman həll olunacaq?
– İyunun sonuna qədər həll olunmalıdır.
– “Araz-Naxçıvan”la anlaşdığın deyilir…
– Ad çəkmək istəmirəm. Amma bir neçə klubla danışıqlar olub. Rəsmi məsələlərin həll edilməsini gözləyirəm.
– Ölkə xaricinə yollanmaq variantı var?
– Menecerlər bir neçə ölkə təklif ediblər. Amma dediyim kimi, gözləmək məcburiyyətindəyəm.
FƏRİD