Konfrans Liqasının 2-ci təsnifat mərhələsində “Sabah”la qarşılaşacaq Hayfa “Makkabi”si heyətini gücləndirib.
Futbolinfo.az İsrail mətbuatına istinadən məlumatına görə, Netanya “Makkabi”sinin dayaq yarımmüdafiəçisi Ethan Azulayın yeni komandasına transferi təsdiqlənib.
22 yaşlı oyunçu hayfalılarla 4 illik müqavilə bağlayıb. İsrailin olimpiya millisinin üzvünün maaşı da əvvəlki komandasından qat-qat çox olacaq. Belə ki, onun illik 250 min dollar məvacib qazanacağı vurğulanıb. Transfer Hayfa “Makkabi”sinə 1 milyon avroya başa gəlib.
Ancaq Azulay “Sabah”la görüşləri buraxmalı olacaq. Çünki gənc oyunçu İsrailin olimpiya yığması ilə Paris-2024 Yay Olimpiya Oyunlarında iştirak edəcək.
Qeyd edək ki, “Sabah”la “Makkabi” arasında oyunlar iyulun 25-də və avqustun 1-də keçiriləcək.