“Sumqayıt”ın yeni transferi, serbiyalı müdafiəçi Slavişa Radoviçin futbolinfo.az saytına müsahibəsi
– “Sumqayıt”a keçidiniz necə alındı? Buvaxtadək Azərbaycandan başqa təklifiniz olmuşdu?
– Klubdan mənimlə əlaqəyə çıxdılar, “Sumqayıt”ın idman direktoru ilə danışdım. Qısa zamanda bütün şərtlərdə razılığa gəldik. Mənim üçün “Sumqayıt”ın futbolçusu olmaq böyük şərəfdir. Komandada çıxış edən oyunçularla çox söhbətləşirəm. Onlar da klub haqda gözəl sözlər deyirlər. Bunadək Azərbaycandan təklifim olmamışdı. İlk dəfədir ölkənizdən təklif aldım və məmnuniyyətlə qəbul etdim.
– Buraya gələnədək Azərbaycan futbolu haqda hansı məlumata sahib idiniz?
– Azərbaycan Premyer Liqası ilə bağlı müəyyən məlumatım var idi. Çünki burada mənim ölkəmdən, regionumdan çox futbolçu çıxış edir. Bundan əlavə, “Qarabağ”ın avrokuboklardakı oyunlarını görmüşəm. Onların Avropa səhnəsində imza atdığı nəticələrdən xəbərim var. “Qarabağ”ın avrokuboklardakı inamlı çıxışı Azərbaycan futbolu üçün olduqca müsbət haldır.
– Kollektiv sizi necə qarşıladı? Komandaya tam adaptasiya olmağınız üçün nə qədər vaxta ehtiyacınız var?
– Yeni komanda yoldaşlarım məni çox səmimi qarşıladılar. Hamısı yaxşı uşaqlardır. Futbolçu kimi də xoş sözlərə layiqdirlər. Ümid edirəm ki, birlikdə müsbət nəticələrə imza atacağıq.
– Baş məşqçi Samir Abasovu qısa zamandır tanısanız da, onun barədə də fikirləriniz maraqlıdır. Az müddətdə hansı müsbət keyfiyyətlərini görmüsünüz?
– Məşqlərdə məsuliyyətlə işləyirik. Baş məşqçinin bizdən nə istədiyini anlaya bilirik. Samir Abasovun vaxtilə yaxşı futbolçu olduğunu və məşqçi kimi Azərbaycan Premyer Liqasında çempionluq qazandığını bilirəm. Mən də daxil olmaqla, yeni transferlərə komandaya bacardıqca tez adaptasiya olmaq lazımdır. Uyğunlaşma prosesi başa çatdıqdan sonra “Sumqayıt”da oynamaq bizim üçün daha rahat olacaq.
– “Sumqayıt” avrokubok oyunlarına tam hazırdır? Konfrans Liqasında qarşılaşacağınız “Fehervar”ı mübarizədən kənarlaşdıra biləcəksiniz?
– “Fehervar” səddini keçmək üçün nə mümkündürsə, edəcəyik. Rəqibin bütün keyfiyyətlərini bilirik. İnanıram ki, “Fehervar”la ilk oyuna tam hazır çıxacağıq.
– Azərbaycan çempionatının növbəti mövsümünün daha rəqabətli keçəcəyi gözlənilir. Sizcə, “Sumqayıt” gələn sezonda da avrokuboklara vəsiqə uğrunda mübarizə apara biləcək?
– Yuxarı pillələr üçün mübarizə aparacaq çox komanda var. Yolumuza oyun-oyun davam edəcəyik və qeydə alınacaq nəticələrin yekunda bizi hansı yerdə qərarlaşdıracağını görəcəyik. “Sumqayıt” üst pillələrdə olmalıdır.
FƏRİD