UEFA Konfrans Liqasının ikinci təsnifat mərhələsində “Sumqayıt”ın rəqibi olan Macarıstan “Fehervar”ının mərkəz müdafiəçisi Nikola Serafimovun futbolinfo.az saytına müsahibəsi
– Konfrans Liqasının ikinci təsnifat mərhələsində “Sumqayıt”la qarşılaşacaqsız. Rəqibinizi necə dəyərləndirirsiz?
– Azərbaycan təmsilçisinə qarşı oyun bizi gözləyir. Onlar haqqında çox məlumata malik deyiləm. Heyətləri barədə də çox informasiyam yoxdur. Amma orada oynayan həmyerlim Kristian Velinovskini tanıyıram. Çünki onunla əvvəllər bir yerdə oynamışıq. Bir də daha öncə bu klubda çıxış etmiş Todor Todoroskini tanıyıram. Onunla yaxın dostuq.
– Todoroski ilə hansısa söhbətiniz olub?
– Bəli, ondan komanda haqqında, azarkeşləri haqqında soruşdum. Həmçinin Azərbaycanda bizi nə gözləyə biləcəyi ilə bağlı məlumat aldım. O, mənə gözəl şeylər danışdı. Bildirdi ki, “Sumqayıt”ın yaxşı azarkeşləri var, orada futbol üçün hər bir şərait yaradılıb. Ümumiyyətlə, Sumqayıt şəhərində futbol sevilir. Komandanın gələcəyi üçün addımlar atılır, bazası var və yaxşı klubdur.
– Sabah keçiriləcək matçdan əsas gözləntiniz nədir?
– Şansları bərabər dəyərləndirirəm. Çünki hər iki komanda demək olar ki, eyni gücə malikdir. Ümumiyyətlə, uzunmüddətli fasilədən sonra ilk oyun olacaq və bir az çətin alınacaq. Rəqib ilk matçı evdə oynayacaq. Bu, bəlkə müəyyən qədər avantaj sayıla bilər. Açığı, ilk oyunun nə qədər önəmli olduğunu bilmirəm, amma doğma meydan amili üstünlükdür.
– Azərbaycan liqasını izləyirsiz?
– Həqiqət belədir ki, çempionatı çox izləyə bilmirəm. Amma Azərbaycanda yaxşı oyunçular olduğu haqqında məlumatım var. Çünki milli komanda səviyyəsində üz-üzə gəlmişik. Həmçinin bir neçə klubu tanıyıram. Məsələn, “Qarabağ”, “Neftçi”, “Səbail” komandalarının olduğunu bilirəm. Çünki bu komandalarda zaman-zaman dosltarım çıxış edib. Bilirəm ki, Azərbaycan klubları inkişaf edir.
– Daha çox buradakı isti havanın rəqib komandalara problem yaratdığı deyilir. Bu barədə maraqlanmısız?
– Düzdür, eşitmişəm ki, orada hava çox istidir. Sadəcə, ümid edirəm ki, bu, bizim üçün ciddi fərq, ciddi problem yaratmayacaq. Düşünürəm ki, adaptasiya ola biləcəyik. Bakıdakı oyundan öncə orada məşq edəcəyik. Bu zaman öyrəşməyə çalışacağıq. Bakıya səfəri səbrsizlikə gözləyirik, Azərbaycan futbolunun inkişafını və uğur qazanmasını arzu edirəm.
CAVAD