UEFA Konfrans Liqasının 2-ci təsnifat mərhələsi çərçivəsində keçiriləcək “Fehervar” – “Sumqayıt” oyunundan öncə keçiriləcək mətbuat konfransı və açıq məşqin vaxtı məlum olub.
Futbolinfo.az “gənclik şəhəri” təmsilçisinin mətbuat xidmətinə istinadən xəbər verir ki, əvvəlcə Bakı vaxtı ilə saat 17:00-da rəqib komandanın baş məşqçisi Tamaş Peto və bir futbolçu media mənsubları önünə çıxacaq. Saat 18:00-da “Fehervar”ın oyunöncəsi son məşqi keçiriləcək.
Daha sonra “Sumqayıt”ın çalışdırıcısı Samir Abasov və futbolçu Rövlan Muradovun mətbuat konfransı saat 20:30-da baş tutacaq. 21:00-da isə komandanın oyunöncəsi son məşqi keçiriləcək.
Qeyd edək ki, sabah “Şoştoi Arena”da keçiriləcək “Fehervar” – “Sumqayıt” qarşılaşması Bakı vaxtı ilə saat 21:00-da başlayacaq. Sumqayıtdakı ilk matçda Macarıstan klubu 2:1 hesablı qələbə qazanıb.