Bakı “İnter”inin (hazırkı “Şamaxı”) sabiq prezidenti Georgi Nikolov futbolinfo.az saytına müsahibə verib. Bolqarıstanlı funksioner UEFA Çempionlar Liqasının üçüncü təsnifat mərhələsində “Qarabağ” və ölkəsini təmsil edən “Ludoqorets” arasında keçiriləcək oyunlardan danışıb.
– UEFA Çempionlar Liqasının 3-cü təsnifat mərhələsində ölkənizin təmsilçisi “Ludoqorets” Azərbaycan komandası “Qarabağ”la qarşılaşacaq. Bu oyun barədə düşüncələriniz necədir?
– İki ciddi komanda bir-birinə rəqib olub. Hərəsinin öz oyun keyfiyyəti, təcrübəsi və tarixi var. Bolqar klubunun oyunu hələ ki, yaxşı alınır. İki çətin rəqibi keçiblər. İkisi də “Dinamo”dur – Batumi və Minsk təmsilçiləri. İstənilən halda maraqlı olacaq. Proqnoz verməyəcəm. Fikrimcə, “Ludoqorets” hələ tam oyununu göstərməyib. Yəqin ki, onlar ilk mərhələlərdə öz gücünə qənaət etdi.
– Ölkənizin təmsilçisinin güclü tərəfi hansılardır?
– Çox balanslaşdırılmış komandadır. Yaxşı heyətə malikdir.
– Hansı futbolçuları daha təhlükəlidir?
– Bernard Tekpeteyi qeyd etmək olar. O, çox cəld və sürətli futbolçudur. Polşalı Yakub Pyotrovskini də qeyd etmək olar. Bu oyunçu çox vacib fiqurdur. Ümumiyyətlə, bu komandada oyun zamanı futbolçular öz mövqeyini çox əla bilir. Onlar da “Qarabağ” kimi taktiki cəhətdən səliqəli və intizamlı oynayırlar.
– Şansları faizlə necə dəyərləndirərsiz?
– 50-nin 50-yə.
– “Qarabağ”ın 2-ci təsnifat mərhələsində “Linkoln”a qarşı keçirdiyi oyunları izlədiniz?
– Yox, həmin oyunlara baxmamışam. Amma Cəbəllütariq komandası heç zaman kriteriya sayılmır. “Ludoqorets”lə daha çətin olacaq. Məncə, “Qarabağ” Bakıda qalib gələcək, Razqrad klubu isə evdə üstün olacaq. Amma bu nəticələrdən sonra kim mərhələ keçəcək, onu görəcəyik.
– “Qarabağ” heyətinin əsasını qoruyub saxlaya bildi. Bunu üstünlük saymaq olar?
– Bəli, “Qarabağ” əsas heyəti saxlayıb. Amma bu, “Ludoqorets”ə də aiddir. Oyun stilini və əsas oyunçularını qoruya bildilər.
– Matçı izləyəcəksiz?
– Matç Razqradda olacaq. Mənim yaşadığım Varna şəhərindən 120 km aralıda keçiriləcək. Oyuna getməyə və “Qarabağ”a azarkeşlik etməyə çalışacam.
– “Qarabağ”a azarkeşlik edəcəksiz?
– Əlbəttə, “Qarabağ”ı dəstəkləyəcəyəm. Mən “Ludoqorets” fanatı deyiləm. Mənim komandam ÇSKA-dır. Ona görə “Qarabağ”ın udmasını istəyirəm, çünki onlara simpatiyam var.
CAVAD