Azərbaycan millisinin basketbolçusu Amil Həmzəyev “Neftçi” ilə bir illik müqavilə imzalayıb. “Ağ-qaralar” növbəti mövsüm avrokuboklara vəsiqə qazanarsa, təcrübəli oyunçu ilə müqavilə daha bir il uzadılacaq.
Həmzəyev futbolinfo.az saytına açıqlamasında başqa təklifləri olsa da, “Neftçi”də oynamaq arzusunda olduğunu bildirib: “Ölkə daxili və xarici bir çox klubdan təkliflər var idi. Sadəcə, özümə ən uyğun olanı seçdim. “Neftçi” ilə danışıqlarımız 2022/23 sezonundan gedirdi. Mənim üçün çox dəyərli təkliflərdən idi. Çünki Azərbaycanda idman deyiləndə ağıla birinci gələn yer “Neftçi”dir. Məncə, bu ailənin üzvü olmaq hər kəsin arzusudur. Xoşbəxtəm ki, bu arzum həyata keçdi. Transfer deyil, bu ailəyə daxil oldum. Mənim üçün böyük şərəf və qürur hissidir. İnşallah, komandamın uğurları üçün əlimdən gələni edəcəm”.
Qeyd edək ki, Amil Həmzəyev ötən mövsüm “Xəzri”nin heyətində çıxış edib və Azərbaycan çempionatının gümüş medalını qazanıb.
GÜNAY SÜLEYMANOVA